1

ಮನೆತನಕ ಬಂದವರನ್ನ ಅಪಮಾನಿಸಿ
ಕಳಿಸಬಾರದು. ಗೋರಿಗಳು ಇವತ್ತಿನವರೆಗೂ ಒಬ್ಬನೇ
ಒಬ್ಬನನ್ನ ವಾಪಾಸು ಕಳಿಸಿದ ಉದಾಹರಣೆಗಳಿವೆಯಾ??

2

ಜೋಡಿಗಳ ಸಲ್ಲಾಪದ ರೀತಿಗೆ
ಮಂಚದ ಕಾಲುಗಳಿಗೆ ಸಣ್ಣಗೆ
ಬಿಸಿಯೇರುತ್ತಿತ್ತು.

3

ಅವಳ ಬೆರಳಸಂದುಗಳಲ್ಲಿ
ಬೆಸೆದುಕೊಂಡೆ.
ಹೊಸದೊಂದು ಲೋಕ ತೆರೆದುಕೊಂಡಿತು.

4

ದೇವರು ಕಲ್ಲಾಗಿದ್ದೇ ಸರಿ.ಕೋಮುಗಲಭೆಗಳ
ಕಲ್ಲೇಟಿಗೆ ಗಾಯಗೊಂಡಿದ್ದರೆ, ರಕ್ತದ
ಗುಂಪನ್ನ ಎಲ್ಲಿ ಅಂತ ಹುಡುಕೋದು.

5

ಹಳಸಿದ್ದನ್ನೇ ಕವಿ ಪದೇ ಪದೇ ಉಣಿಸುತ್ತಿದ್ದಾನೆಂದರೆ
ಆತನ ‘ಕವಿತ್ವ’ ಸನ್ಮಾನದ ಶಾಲುಗಳಲ್ಲಿ
ಗಡದ್ದಾಗಿ ನಿದ್ರಿಸುತ್ತಿರಬಹುದು.

6

ಕಾಮಹಿನ್ನಲೆಯ ಪ್ರೇಮ ಕಾಗದದ
ದೋಣಿ ಇದ್ದಂತೆ. ಮೈಯೊಳಗಿನ ಬಿಸಿ
ಇಳಿದ್ದಿದ್ದೇ ತಡ ಮುಂದಕ್ಕೆ ಚಲಿಸದು.

7

ಹಳೆಯ ಪ್ರೇಮಪತ್ರಗಳನ್ನ ಹುಡುಕುತ್ತಿರುವೆ,
ಪುರಾತನ ಪಳಿಯುಳಿಕೆಗಳ
‘ಶೋಧಕ’ ಎಂದು ಹೀಯಾಳಿಸುತ್ತಾಳೆ..