ಹಾಗೊಂದು…ಹೀಗೂ ಒಂದು…
ರಜನಿ ಗರುಡ
ಹೊರಗೊಂದು ಕಾಲಿಟ್ಟೆ
ಆಡಿದ್ದ ಮಾತು
ಒಂಟಿಕಾಲಲ್ಲೇ ನೆಲದಲ್ಲಿ
ಬೇರಿಳಿಸಿದ್ದು ತಿಳಿಯಲೇ ಇಲ್ಲ
ಇನ್ನೇನಿದ್ದರೂ
ಆಕಾಶಕ್ಕೆ ನೆಗೆತು ಚಿಗಿಯ ಬೇಕು
ಅಲ್ಲಿ ಹೂ ಬಿಟ್ಟು
ಪರಿಮಳದಪ್ಪಣೆಗೆ ಕಾಯಬೇಕು
******
ಪ್ರೇಮದ ಕೈ ದೀವಿಗೆಯ
ಹಿಡಿದು ಹೊರಟಿದ್ದೇನೆ
ತಲುಪುವ ತಾಣ ಮಾತ್ರ
ದೀವಿಗೆಗೇ ತಿಳಿದಿರಬೇಕು
******
ಈ ಕತ್ತಲೆಯ ಬೆನ್ನಿಗಂಟಿರುವ
ಬೆಳಗಲ್ಲಿ ಪಡೆದದ್ದೆಷ್ಟು….!!??
ಎದುರು ಗೋಡೆಯೂ
ಬೆವರೊಡೆವ ಕ್ಷಣಕೆ ಕಾಯುತಿರಲು
ಕತ್ತಲಿಗೇ ಕೈಕಾಲು ಮೂಡಿ
ತನ್ನ ಗಾಢ ತೆಕ್ಕೆಯೊಳಗೆ
ಸೆಳೆದುಕೊಂಡು ಬಿಡಲಿ
ಅಲ್ಲಿ ಹತ್ತಿ ಉರಿದಿದ್ದೆಲ್ಲ
ನನ್ನ ಬೆಳಗಾಗಲಿ
******
ಏನೂ ಸಿಗದಾಗ ನಿನ್ನ
ನೆನಪಿಗಾತುಕೊಳ್ಳುತ್ತಿದ್ದೆ
ಈಗದನು ಊರುಗೋಲು
ಮಾಡಿಕೊಂಡಿದ್ದೇನೆ
manadalli tumbiruva nova
mareyalu alutide jeeva
maretu mareyagoke kadutide bava
bavaneyalli badukutiruva jeevakke
yavaga neleyaguvano hava