ಪಿ ಪಿ ಉಪಾಧ್ಯ
ಸಾವಿರ ಬೆಳಗನು ಕಂಡಿಹ ಜೀವಕೆ
ಬೆಳಕದು ಕಣ್ಣಿಗೆ ಬೀಳಲೇ ಇಲ್ಲ.
ಬದುಕಿನ ಚಿತ್ರವು ಎದುರಿಗೆ ಇದ್ದರು
ಬಾಳುವ ಹಾದಿ ಕಾಣಿಸಲೇ ಇಲ್ಲ
ಜೀವನದಾಸೆಯು ಮನ ತುಂಬಿದರೂ
ಕನಸಿನಿಂದೀಚೆಗೆ ಬರಲೇ ಇಲ್ಲ
ದೇವರ ಗುಡಿಗಳೇ ಊರಲ್ಲೆಲ್ಲ
ದೇವರು ಮಾತ್ರ ಎಲ್ಲೂ ಇಲ್ಲ
ಪ್ರಾರ್ಥನೆ ಪೂಜೆ ದಿನ ಬೆಳಗೆಲ್ಲ
ಸಿಕ್ಕಿದ್ದೊಂದೇ ಒಣ ಹೂವಿನ ಎಸಳು
ಸಂಬಂಧಿಕರೇ ಸುತ್ತಿಹರೆಲ್ಲೂ
ಸಂಬಂಧವು ಅದು ಮರೀಚಿಕೆಯೇ
ಸುತ್ತ ಮುತ್ತಲೂ ಗೆಳೆಯರ ಬಳಗ
ಗೆಳೆತನ ಮಾತ್ರ ಮಾಯಾ ಮೃಗವೇ
ಪ್ರೀತಿ ಪ್ರೇಮದ ಬೊಬ್ಬೆಯೇ ಹೊರತು
ಪ್ರೀತಿಸೋ ಪ್ರೇಮಿಯ ಸುದ್ದಿಯೇ ಇಲ್ಲ
ಸುಖ ಜೀವನವನು ಬಯಸಿದ್ದಷ್ಟೇ
ವಾಸ್ತವ ಬದುಕಲಿ ಬರೀ ನರಳಾಟ
ಸಿರಿ ಸಂಪತ್ತಿಗೆ ಹೋರಾಡಿದ್ದೇನು
ಅಂತಿಮವಾಗಿ ಸಿಕ್ಕಿದ್ದೇ ಸೊನ್ನೆ
ಬದುಕಿನ ಪಯಣದ ದಾರಿಯಲೆಲ್ಲ
ಸಂತಸವೆಂದೂ ಕೈಗೆಟುಕದ ಆಟ
ಎಲ್ಲವ ತಿಳಿದೂ ಬದುಕುವ ನಾವು
ಎಂದೂ ಸಹಿಸೆವು ಸಾವಿನ ದುಃಖ
ಇದು ದಿನ ಬೆಳಗಿನ ಜೀವನದಾಟ
ವಿಧಿ ತಾನೇ ಹೂಡಿದ ಹೂಟ
0 ಪ್ರತಿಕ್ರಿಯೆಗಳು