ಸೌಜನ್ಯ ನಾಯಕ

ಅದೆಷ್ಟೋ ವರ್ಷಗಳು ಸರಿದಿದೆ
ನೀ ನನ್ನನು ತೊರೆದು ಗೆಳೆಯ
ಆದರೂ ಹೊತ್ತಲ್ಲದ ಹೊತ್ತಲ್ಲಿ
ನಿನ್ನ ನೆನಪ ಹೊತ್ತು ತರುವುದು ಹೃದಯ

ಅದೇನು ಮೋಡಿ ಮಾಡಿ ತೊರೆದೆಯೋ
ಅರೆಗಳಿಗೆಯೂ ಅಗಲಿರಲಾರದಂತೆ ನಾ ನಿನ್ನ
ಮಾಡುವ ಪ್ರತಿ ಕೆಲಸವ ಕದಡಲು
ನೆನಪಾಗುವ ಆ ನಿನ್ನ ನೆನಪೆ ಸಾಕಿನ್ನ

ಬಂದೊಮ್ಮೆ ನೋಡು
ಕಲೆಗಾರ್ತಿಯಾದ ನನ್ನ
ಕುಂಚದಲ್ಲರಳಿದ ಚಿತ್ರವ
ಬೇಡವೆಂದರೂ ಒಡೆದ ಮನಸು
ಪದೇ ಪದೇ ಚಿತ್ರಿಸುವುದು
ನಿನ್ನದೆ ಆ ನಗು ಮೊಗವ

ನಗು ಹೊತ್ತ ಆ ನಿನ್ನ ಮೊಗವು
ನನ್ನ ತೊರೆದವನ ನೆನಪಿಸುತಿಲ್ಲ
ಆ ಕಾರಣಕ್ಕೆ ಇರಬೇಕು
ಪದೆ ಪದೆ ಜೊಡಣೆಯಾಗುತಿದೆ
ಹೃದಯದಲ್ಲಿ ಒಡೆದ ಕನಸುಗಳೆಲ್ಲ

ಪ್ರೀತಿಯ ಆರಂಭದ ದಿನಗಳಷ್ಟೇ
ಮನಸಲ್ಲಿ ಮನೆ ಮಾಡಿರುವ
ಕಾರಣಕೋ ಏನೋ
ಹೆಚ್ಚೇ ಕಾಳಜಿ ವಹಿಸಿದವನಂತೆ
ನೆನಪಾಗುತಿರುವೆ ಈ ಮನಸಿಗೆ ನೀನಿನ್ನು…