ಸ್ಫೂರ್ತಿ ಗಿರೀಶ್ 

ಖಾಲಿ ಚೇರು…

ಈಗಷ್ಟೇ ಎದ್ದುಹೋದ
ಕುರುಹಿಗೆ
ನಿನ್ನ ಗಂಧ
ಗಾಳಿಯಲಿ ಸುಳಿದಿದೆ

ಸಂಜೆಯ ಹೂ
ನಿನ್ನ ಸ್ಪರ್ಶಕ್ಕೆ
ಮರಳಿ
ಮೊಗ್ಗಾಗಿದೆ

ನಿನ್ನ ಕಾಲ್ಬೆರಳು
ಕೆದರಿಹಾಕಿದ್ದ
ಮರಳುಗುಪ್ಪೆಯಲಿ
ಇರುವೆಗಳು ಹೊಸಕಾವ್ಯ ಬರೆದಿವೆ

ಮರದ ಎಲೆಗಳು ಬಾಗಿ
ನೀನು ಕುಳಿತುಹೋದ
ಖಾಲಿ ಚೇರುಗಳ ಸಂತೈಸಿ
ನಿಟ್ಟುಸಿರು ಕೇಳುತ್ತಿವೆ
ನನಗೆ ಕಿವಿಗಳಿಲ್ಲ
ಅವಕ್ಕೆ ಹೃದಯವಿಲ್ಲ.

ಗುಲಾಬಿಗೆ
…
ಎಲ್ಲಾ ಮುಳ್ಳುಗಳನ್ನು ದಾಟಿ ಬರುವೆ
ಗುಲಾಬಿ
ಕೂಳೆಯ ಪಸೆಯಲ್ಲಾದರು
ಜೀವ ಜಿಲ್ ಅನಿಸುವಂತೆ ಅರಳಿಬಿಡು
ಒಮ್ಮೆ ಕಣ್ಣು ತುಂಬಿಕೊಳ್ಳುವೆ
ಎದೆಗೆ ಒತ್ತಿಕೊಳ್ಳುವೆ

ಈಗ ಯುದ್ಧ ಮುಗಿದಿದೆ ನೋಡು
ನನ್ನ ಕೌದಿ ಹಚ್ಚ ಬಿಳಿಯದು
ಎಲ್ಲಾ ಗೆರೆಗಳನ್ನು ದಾಟಿ ಬರುವೆ ಗುಲಾಬಿ
ಕೂಳೆಯ ಪಸೆಯಲ್ಲಾದರು
ಜೀವ ಜಿಲ್ ಅನಿಸುವಂತೆ ಅರಳಿಬಿಡು
ಒಮ್ಮೆ ಕಣ್ಣು ತುಂಬಿಕೊಳ್ಳುವೆ
ಎದೆಗೆ ಒತ್ತಿಕೊಳ್ಳುವೆ

ಎಷ್ಟು ಆಸೆ ಎಷ್ಟು ಮೋಹ
ಮಾಯೆಯ ಬಲೆ ಈ ಲೋಕ
ಎಲ್ಲಾ ಕವಲು ದಾಟಿಬರುವೆ ಗುಲಾಬಿ
ಕೂಳೆಯ ಪಸೆಯಲ್ಲಾದರು
ಜೀವ ಜಿಲ್ ಅನಿಸುವಂತೆ ಅರಳಿಬಿಡು
ಒಮ್ಮೆ ಕಣ್ಣು ತುಂಬಿಕೊಳ್ಳುವೆ
ಎದೆಗೆ ಒತ್ತಿಕೊಳ್ಳುವೆ