ರೂಪಾ ಹಾಸನ್

ಆಸ್ಪತ್ರೆಯಲ್ಲೊಂದು ಸತ್ತು ಹುಟ್ಟಿದ ಮಗುವಿಗೆ ಸಂಬಂಧಿಸಿದ ವಿಶೇಷ ಕೇಸ್ ಇದೆ. ತಾಯಿಯನ್ನು ಒಪ್ಪಿಸಿ ಕಂಪ್ಲೆಂಟ್ ಪಡೆದರೆ ದೊಡ್ಡ ಜಾಲವೇ ಹೊರಬೀಳುತ್ತದೆ ಬೇಗ ಬನ್ನಿ ಎಂದು ವೈದ್ಯ ಮಿತ್ರೆಯೊಬ್ಬರು ದೂರವಾಣಿ ಮೂಲಕ ತಿಳಿಸಿದಾಗ ನಾವು ದಢಬಡಿಸಿ ಅಲ್ಲಿಗೆ ಓಡಿದ್ದೆವು…
ಗ್ರಾಮೀಣ ಪ್ರದೇಶದಲ್ಲಿ ಕೂಲಿ ಮಾಡಿ ಬದುಕುವ 32ರ ಹರೆಯದ ಆ ತಾಯಿಗದು ಆರನೇ ಬಸಿರು! ಮೊದಲನೆಯ ಬಸಿರಿಗೆ 3 ತಿಂಗಳೊಳಗೇ ಗರ್ಭಪಾತವಾಗಿತ್ತು. ಮತ್ತೆ ಸಾಲಾಗಿ 3 ಹೆಣ್ಣುಮಕ್ಕಳು. 5ನೆಯದು ಐದನೇ ತಿಂಗಳಲ್ಲಿ ಗರ್ಭಪಾತವಾಗಿತ್ತು. ಮತ್ತೆ ಈಗ ಆರನೆಯದು. 8ನೇ ತಿಂಗಳಲ್ಲೇ ತಾಯಿಗೆ ವಿಪರೀತದ ರಕ್ತಸ್ರಾವವಾಗಿ ಹೆರಿಗೆ ಮಾಡಿಸಿದಾಗ ಗಂಡು ಮಗು ಸತ್ತು ಹುಟ್ಟಿತ್ತು!

ವಿಷಯ ಮಾತ್ರ ಇಷ್ಟು ಸರಳವಾಗೇನಿರಲಿಲ್ಲ! ಆ ತಾಯಿ ಆಸ್ಪತ್ರೆಗೆ ದಾಖಲಾಗುವಾಗ ಬರೆದುಕೊಟ್ಟ ವಿವರಣೆಯಲ್ಲಿ, ‘ಮಗು ಬೇಡವೆನಿಸಿ ಗರ್ಭಪಾತಕ್ಕಾಗಿ ತಾಲ್ಲೂಕು ಆಸ್ಪತ್ರೆಗೆ ಹೋಗಿ ಕೇಳಿದಾಗ ಮಾತ್ರೆ ಕೊಟ್ಟರು. ತೆಗೆದುಕೊಂಡ ನಂತರ ರಕ್ತಸ್ರಾವ ಹೆಚ್ಚಾಗಿ, ಇಲ್ಲಿ ಆಗುವುದಿಲ್ಲವೆಂದು ಜಿಲ್ಲಾಸ್ಪತ್ರೆಗೆ ಕಳಿಸಿದರು’ ಎಂದಿತ್ತು. ಆದರೆ ವೈದ್ಯ ಮಿತ್ರೆ ಅನುಮಾನದಿಂದ ಕ್ರಾಸ್ ಚೆಕಿಂಗ್ ಮಾಡಿದಾಗ ತಿಳಿದು ಬಂದಿದ್ದು……
ಆ ಮಹಿಳೆ ಸ್ಕ್ಯಾಂನಿಗ್ ಮೂಲಕ ಲಿಂಗ ಪತ್ತೆ ಮಾಡಿಸಿಕೊಂಡಿದ್ದು, ಸ್ಕ್ಯಾಂನಿಂಗ್ ಸೆಂಟರ್ನವರು ಗಂಡು ಮಗುವಿಗೆ ಬದಲಾಗಿ ಹೆಣ್ಣೆಂದು ತಪ್ಪಾಗಿ ತಿಳಿಸಿದ್ದರಿಂದ ಇವಳು 7ನೇ ತಿಂಗಳಿನಲ್ಲಿ ಗರ್ಭಪಾತಕ್ಕೆ ಪ್ರಯತ್ನಿಸಿದ್ದಳು! ವೈದ್ಯರು ಗರ್ಭಪಾತದ ಮಾತ್ರೆಗಳನ್ನು ಕೊಟ್ಟಿದ್ದರು ಎಂದರೆ ಸರಿಯೇನೋ! ಆದರೆ ವಿಪರೀತ ರಕ್ತಸ್ರಾವ ಪ್ರಾರಂಭವಾಗಿ ಜಿಲ್ಲಾಸ್ಪತ್ರೆಗೆ ದಾಖಲಾಗಿ, ವೈದ್ಯರು ಹೆರಿಗೆ ಮಾಡಿಸಿದಾಗ ಹೊರಬಂದಿದ್ದು ಗಂಡು ಶಿಶುವಿನ ಶವ! ಹಿಂದಿನ ಬಸಿರಿನಲ್ಲಿ 5 ತಿಂಗಳಿಗೆ ಗರ್ಭಪಾತವಾಗಿದ್ದು ಕೂಡ ಹೊಟ್ಟೆಯಲ್ಲಿ ಹೆಣ್ಣು ಮಗುವಿತ್ತೆಂದೇ!
ಆ ಮಹಿಳೆಗೆ ಇದು ತಪ್ಪೆಂದು ಎಷ್ಟೆಲ್ಲಾ ತಿಳಿ ಹೇಳಲು ಪ್ರಯತ್ನಿಸಿದ್ದೆವು….. ಲಿಂಗ ಪತ್ತೆ ಮಾಡಿದ, ತಪ್ಪಾಗಿ ಲಿಂಗ ಪತ್ತೆ ಮಾಡಿದ ಕುರಿತು ಸ್ಕ್ಯಾಂನಿಂಗ್ ಸೆಂಟರ್ ವಿರುದ್ಧವಾಗಿ ಒಂದು ದೂರು ಪಡೆಯಲು ಎಷ್ಟೆಲ್ಲಾ ಹರ ಸಾಹಸ ಮಾಡಿದ್ದೆವು……ಈಗಾಗಲೇ ಅದೆಷ್ಟು ಕಂದಮ್ಮಗಳ ಕೊಲೆಗೆ ಕಾರಣರಾಗಿದ್ದಾರೋ, ಮುಂದೆ ಇನ್ನೆಷ್ಟು ಇಂತಹ ಕೊಲೆಮಾಡುತ್ತಾರೋ…. ಧೈರ್ಯ ಮಾಡಿ ದೂರು ಕೊಟ್ಟರೆ ನಾವು ಜೊತೆಗಿರುತ್ತೇವೆ, ನಿನಗಾದ ಅನ್ಯಾಯ ಬೇರೆಯವರಿಗಾಗಬಾರದಲ್ಲವೇ? ಎಂದು ಇನ್ನಿಲ್ಲದಂತೆ ತಿಳಿಹೇಳಲು ಪ್ರಯತ್ನಿಸಿದ್ದೆವು, ಆದರೆ ಎಲ್ಲವೂ ವ್ಯರ್ಥವಾಗಿತ್ತು…… ಕಂದಮ್ಮಗಳ ಸಾವಿಗೆ ಇಲ್ಲಿ ಯಾವುದೇ ಶಿಕ್ಷೆಯೂ ಇರಲಿಲ್ಲ. ಏಕೆಂದರೆ ಸಾಕ್ಷಿಗಳಿಲ್ಲವಲ್ಲ!
ಹೆಣ್ಣೆಂಬ ಒಂದೇ ಕಾರಣಕ್ಕೆ ಗರ್ಭದಲ್ಲೇ ಹಲ್ಲೆಗೊಳಗಾಗುತ್ತಿರುವ ಕಂದಮ್ಮಗಳ ಆರ್ತನಾದ ನಮಗೇಕೆ ಕೇಳುತ್ತಿಲ್ಲಾ? ತಾಯಿಯೇ ನಿರ್ದಯವಾಗಿ ತನ್ನದೇ ಕುಲವನ್ನು ನಿದರ್ಾಕ್ಷಿಣ್ಯವಾಗಿ ಕೊಂದು ಬಿಸುಟುವಷ್ಟು ಬ್ರೈನ್ ವಾಷ್ ಮಾಡುತ್ತಿರುವ ನೀಚತನಕ್ಕೆ ಯಾರಿಗೆ ಶಿಕ್ಷೆ ಕೊಡೋಣ? ಅರಿವಿಲ್ಲದೇ ಇಂತಹ ಅಪರಾಧದಲ್ಲಿ ಭಾಗಿಯಾಗುತ್ತಿರುವ ತಾಯಿಗೇ? ಒತ್ತಡ ಹೇರುತ್ತಿರುವ ಕುಟುಂಬಕ್ಕೇ? ಇಂತಹದೊಂದು ಅಮಾನುಷ ಮನಸ್ಥಿತಿಯನ್ನು ನಿಮರ್ಾಣ ಮಾಡಿರುವ ಸಮಾಜಕ್ಕೇ? ವರ್ಷಕ್ಕೆ ಅಂದಾಜು 6ರಿಂದ10 ಲಕ್ಷಗಳಷ್ಟು ಹೆಣ್ಣು ಭ್ರೂಣಗಳನ್ನು ಅಂತಃಕರಣವಿಲ್ಲದೇ ಹೊಸಕಿ ಹಾಕುತ್ತಿರುವ, ನಾವು ದೈವ ಸ್ವರೂಪಿಗಳೆಂದು ನಂಬುವ ವೈದ್ಯರಿಗೇ? ಇಂತಹ ಅಗಾಧ ಪ್ರಮಾಣದ ಕ್ರೌರ್ಯ ಹೆಣ್ಣು ಕಂದಮ್ಮಗಳ ಮೇಲೆ ಹುಟ್ಟುವ ಮೊದಲೇ ನಡೆಯುತ್ತಿದ್ದರೂ ಗಂಭೀರವಾಗಿ ಪರಿಗಣಿಸದೇ, ಎಚ್ಚೆತ್ತುಕೊಂಡಿಲ್ಲದ ಸಕರ್ಾರಕ್ಕೇ? ಯಾರಿಗೆ ಶಿಕ್ಷೆ ಕೊಡುವುದು? ಶಿಕ್ಷೆ ಕೊಡುವವರಾರು?
ಇಂದು ಮತ್ತೊಂದು ಮಕ್ಕಳ ದಿನಾಚರಣೆ! ಈ ಮೂಲಕ, ನಾವು ಕೊಲ್ಲುತ್ತಿರುವ ಲಕ್ಷಾಂತರ ಕಂದಮ್ಮಗಳಿಗೊಂದು ತಣ್ಣನೆಯ ಶ್ರದ್ಧಾಂಜಲಿಯನ್ನಾದರೂ ಅಪರ್ಿಸಬೇಕೆನ್ನಿಸುತ್ತಿದೆ. ದೇವರೆ ನಮ್ಮನ್ನು ಕ್ಷಮಿಸು!