ಮಮತಾ ಅರಸೀಕೆರೆ 

ನಾನು ಭರಪೂರ ನಗುತ್ತಿದ್ದೇನೆಂದರೆ
ಅಳು ನನ್ನನಾಳುತ್ತಿದೆಯಂದರ್ಥ

–

ಅಳು ನಗುವಿನ ಮೇಲೆ ಸವಾರಿ ಮಾಡುತ್ತಿದೆ
ಇಂಧನ ತೀರಲು ಕಾಯುತ್ತಿದ್ದೇನೆ

–

ಅಳುವಿಗೂ ನಗುವಿಗೂ ನಡುವೆ ಗೋಡೆ ಕಟ್ಟಿದೆ
ಸಂಪೂರ್ಣ ನಿರ್ಲಿಪ್ತಳಾಗಬೇಕೆಂದಿದ್ದೇನೆ

–

ಅದೆಷ್ಟೋ ದಿನಗಳಿಂದ ನಗು ಮರೆತೇಹೋಗಿದೆ
ಅಳುವೆಂಬುದು ವಂಶಪಾರಂಪರ್ಯವೇ?

–

ಮನಸು ಒಂದೇ ಸಮನೆ ನರಳುತ್ತಿದೆ
ನಗುವ ತೊಟ್ಟಿಲ ತೂಗುವ ಕೈಗಳು ಅಳುವಿನದ್ದೇ

–

ನಾನೆಂದೂ ನಗುವಿಗೆ ಜಿಪುಣಳಾಗಿಲ್ಲ
ಅಳುವೇಕೋ ಮಿತಿಮೀರಿ ವಸೂಲಾತಿಗಿಳಿದಿದೆ

–

ನಾನೇನೂ ಅಳುವಿಗೆ ಸಾಲ ಕೊಡಬೇಕಿಲ್ಲ
ನಗುವನ್ನು ಖಾತ್ರಿಗಾಗಿ ಅಡವಿಟ್ಟುಕೊಂಡಿದೆ

ನಗಲು ಅನುಮತಿ ಪಡೆಯಬೇಕಿದೆಯೇ ?
ಅಳುವಿನ ಮೊದಲ ಸಾಲಿನಲ್ಲೇ ಉಲ್ಲೇಖವಿದೆಯಂತೆ

–

ನಗು ಜಾರಿ ಬಿದ್ದು ಅಂಗವಿಕಲವಾಗಿದೆ
ಅಳುವಿಗೆ ನಿರ್ಬಂಧ ವಿಧಿಸಿದ ಸಂತೋಷ

–

ನಕ್ಕೂ ಸಾಯುತ್ತೇನೆಂದು ಇನ್ನೂ ಹೇಳಿಯೇ ಇಲ್ಲ
ಅಳುವಾಗಲೇ ಚಿರಂಜೀವಿಯಾಗಿಬಿಟ್ಟಿದೆ

–

ನಗುವಿನ್ನೂ ಅಂಬೆಗಾಲಿಡಲು ಹೆದರುತ್ತಿದೆ
ಅಳು ಆಗಲೇ ಶರಧಿ ದಾಟಿಯಾಯಿತು ನೋಡು

–

ನಗುವಿನ್ನೂ ಮೊದಲ ತೊದಲ್ನುಡಿ ಕಲಿಯಲೇ ಕಷ್ಟ
ಅಳುವಾಗಲೇ ಹುಸಿಭಾಷಣವಾರಂಭಿಸಿದೆ

–

ನಗುವೆಂಬ ಕವಿತೆ ಆರಂಭಿಸಲು ಹೆಣಗುತ್ತಿದ್ದೇನೆ
ಅಳುವೆಂಬುದು ಗದ್ಯ ಗ್ರಂಥವನ್ನೇ ಬರೆಸಿಕೊಂಡಿದೆ

–

ಕಿರುನಗಲೂ ಮುಜುಗರ ಹಿಂಜರಿಕೆ ಸಂಕೋಚ
ಅಳುವಿಗೆ ಬಿಡುಬೀಸುತನ ಅಭ್ಯಾಸವಾಗಿಹೋಗಿದೆ

–

ಅಳುವಿಗೆ ಅದೆಷ್ಟೊಂದು ಗೆಳೆಯರ ಬಳಗ
ನಗು ಅಸಹಾಯಕತೆಯಿಂದ ಒಂಟಿಯಾಗಿದೆ

–

ಅತ್ತು ಅತ್ತು ಹೈರಾಣಾಗಿದ್ದೇನೆ ಕುಸಿದಿದ್ದೇನೆ
ನಗು ಹೆಗಲಾಗುತ್ತದೆಯೆಂದರೆ ಅದಕೂ ಕಾಡುವ
ಅನಾಥತೆ

–

ಬಿಡು ಬಿಡು ನಗು ಬಹಳ ನಿರ್ದಯಿ
ಅಳುವಿನ ವಾತ್ಸಲ್ಯಕ್ಕೆ ಮನಸಾಗಲೇ ಹೊಂದಿಕೆಯಾಗಿದೆ

–

ನಗು ಅಷ್ಟೇನೂ ರಸಿಕನಲ್ಲ ಒಲವಿನ ಪರಿಯೂ ತಿಳಿದಿಲ್ಲ
ಅಳು ಅಪ್ಪಿಕೊಳ್ಳುವ ರಭಸಕ್ಕೆ ಮೈಥುನದ ಸುಸ್ತು

–

ನಾನು ನಗುತ್ತಿದ್ದರೆ ಅಳುವಿಗೇನೋ ಬೇಸರ
ಅಳುವುದು ಅಶಕ್ತತೆಯೂ ದೌರ್ಬಲ್ಯವೂ ಅಲ್ಲ ಬಿಡು

–

ಅಳುವಿನ ಅಮಲು ಎದೆಗೇರಿದೆ
ನಗುವಿನ ಮಾದಕತೆ ಒಳಗಿಳಿಯುತ್ತಿಲ್ಲ

–

ಅಳುವಿನ ಎದುರು ನಗುವಿನ ಮೌಲ್ಯ ಬಿದ್ದುಹೋಗಿದೆ
ಹರಾಜಿನಲ್ಲಾರೋ ಜೋರಾಗಿ ಆರ್ಭಟಿಸುತ್ತಿದ್ದಾರೆ