ರವಿ ಅರೇಹಳ್ಳಿ

0.5% ಸ್ವಚ್ಛ ಭಾರತದ ಹೆಸರಿನ ಹೆಚ್ಚುವರಿ ಸೆಸ್ ಜಾರಿಗೆ ಬಂದಿದೆ!

ನನ್ನ ಮೊಬೈಲ್‌ನ 200 ರೂಪಾಯಿಯ full talk time 198 ಕ್ಕೆ ಇಳಿದಿದೆ.

ಈಗಾಗಲೇ ಇರುವ 14% ಸೇವಾ ತೆರಿಗೆ (ವಾರ್ಷಿಕ 2.09 ಲಕ್ಷ ಕೋಟಿ) ಯೇ ಹೆಣ ಭಾರವಾಗಿ ಕುಳಿತಿರುವಾಗ ಇನ್ನೊಂದು ಪೀಡೆ ಜೊತೆಯಾಗುತ್ತಿದೆ. ನಮಗೆ ಗೊತ್ತಾಗದಂತೆ ಮೊಬೈಲ್ ಸೇರಿದಂತೆ ಬಹುತೇಕ ಸೇವೆಗಳ ಬೆಲೆಗಳು ದುಬಾರಿಯಾಗಿ ಹೋಗುತ್ತವೆ.

ಈ ಸೆಸ್ ತಗೋಂಡು ಏನ್ಮಾಡ್ತೀರಿ ಅಣ್ಣಾ ಅಂತಾ ಕೇಳಿದ್ರೆ, ಉತ್ತರ ಎಲ್ಲೆಲ್ಲೋ ಸುತ್ತಾಡಿ ಅದರ ಚುಂಗು ಗಂಗಾನದಿಯ ದಡದಲ್ಲಿ ನಿಂತು ಹೋಗುತ್ತದೆ. ಅಲ್ಲಣ್ಣಾ ಗಂಗಾನದಿಯ ದಡದಗುಂಟ ನೀವೇ ಸಾಕಿರುವ ಲಕ್ಷಾಂತರ ಫ್ಯಾಕ್ಟರಿಗಳು, ಘಾಟುಗಳು, ಹೆಣಗಳು ಅವನ್ನೆಲ್ಲಾ ಏನು ಮಾಡ್ತೀರಿ.. ಸರಿ! ಎಷ್ಟು ವರ್ಷದಲ್ಲಿ ಅದನ್ನು ಕ್ಲೀನ್ ಮಾಡ್ತೀರಿ,. ನಾವು ಎಷ್ಟು ವರ್ಷ ಹೆಚ್ಚುವರಿ ತೆರಿಗೆ ಕಟ್ಟಬೇಕು.. ಎಲ್ಲೂ ಉತ್ತರವಿಲ್ಲ.

ನಿಮ್ಮದೇ ಹಿತ್ತಲಿನ ಯಮುನಾ ಕೊಳಕು ಚರಂಡಿಯ ಕಥೆ ಏನು, ಒಟ್ಟು ಬಾಚಿದ್ದರಲ್ಲಿ ನಮ್ಮದೇ ಕಾವೇರಿ, ಕೃಷ್ಣಾಗಳ ಸ್ವಚ್ಛತೆಗೇನು ಕೊಡುತ್ತಿದ್ದೀರಿ.

ಉತ್ತರವಿಲ್ಲ!

ಪ್ರಸ್ತುತ ಹಣಕಾಸು ವರ್ಷದ ಉಳಿದ ತಿಂಗಳುಗಳಲ್ಲಿ ಈ ತೆರಿಗೆಯಿಂದ ಸಂಗ್ರಹವಾಗಬಹುದಾದ 3,800 ಕೋಟಿ (ವಾರ್ಷಿಕ ಅಂದಾಜು ಹತ್ತು ಸಾವಿರ ಕೋಟಿ) ಗಳನ್ನು ಕಾರ್ಪೋರೇಟ್ ಕಂಪನಿಗಳ ತೆರಿಗೆ ಕಳ್ಳತನ ತಪ್ಪಿಸಿ ಗಳಿಸಲು ಸಾಧ್ಯವಿರಲಿಲ್ಲವೆ? ತೆರಿಗೆ ಸಂಗ್ರಹಿಸಲಾಗದ ಅಧಿಕಾರಶಾಹಿ, ಆಡಳಿತಶಾಹಿಯ ಹೊಣೆಗೇಡಿತನದ ಫಲವನ್ನು ಜನ ಸಾಮಾನ್ಯನ ಮೇಲೆ ಹಾಕುವ ಕೆಟ್ಟ ಆಲೋಚನೆಯನ್ನು ನಿಮ್ಮ ತಲೆಗೆ ತುರುಕಿದವವರು ಯಾರೋ..

ಏನೇನು ಉತ್ತರವಿಲ್ಲದ, ಧೀರ್ಘವಾಗಿ ಚರ್ಚೆಗೊಳ್ಳದ ಇಂತಹ ತುಘಲಕ್ ತೆರಿಗೆಯನ್ನು ಜನಸಾಮಾನ್ಯರ ಮೇಲೆ ಹೇರುವುದಕ್ಕೆ ಇದೇನು ಈಸ್ಟ್ ಇಂಡಿಯ ಕಂಪನಿಯ ಆಡಳಿತವೆ..

ನಮ್ಮ ಜನ ಬಿಗ್‌ಬಾಸ್, ಹಂದಿ, ದನ ಇವುಗಳ ಬಗ್ಗೆ ತಲೆಕೆಡಿಸಿಕೊಂಡಷ್ಟು ತೆರಿಗೆ ಹೆಚ್ಚಳದ ಬಗ್ಗೆ ತಲೆ ಕೆಡಿಸಿಕೊಳ್ಳುವುದಿಲ್ಲ. ಹೆಣ ಹೊತ್ತು ಹೊತ್ತೂ ಹೆಗಲು, ಬುದ್ಧಿ ರೂಢಿಗೊಂಡಿವೆ.

ಹಳೆ ಸತ್ಯ: ತೆರಿಗೆ ಹೆಚ್ಚಾದಂತೆ ತಪ್ಪಿಸುವ ಕಳ್ಳರೂ, ಆ ಮೂಲಕ ಅಪರಾಧಿಗಳೂ ಹೆಚ್ಚಾಗುತ್ತಾರೆ!