ಈ ಸುಖದ ರಾತ್ರಿ
ವೆಂಕಟ್ರಮಣ ಗೌಡ
ಸರಿರಾತ್ರಿ; ಸುಮ್ಮನಿಲ್ಲ ಯಾವುದೂ
ಅವಿರತ ಅವರಿವರ ಸದ್ದುಗದ್ದಲವೂ
ಸುಳ್ಳೇಕೆ ಹೇಳಲಿ
ನೀರವವೆಂಬುದು ಈ ಜಗತ್ತಿನಲ್ಲಿ ಸುಳ್ಳು
ಸಣ್ಣಗೆ ಕಂಪಿಸಿದಂತಿದೆ ಆಕಾಶ
ನಕ್ಷತ್ರಗಳ ತಳಮಳ ತಾಕಿ
ತಣ್ಣಗೆ ತುಯ್ದಾಡುತ್ತ ದೀಪ ಅಲ್ಲೊಂದು ಇಲ್ಲೊಂದು
ಜಗತ್ತಿನ ಸಂಕಟಗಳೆಲ್ಲ ಸೂರಿನಡಿ ಮಾತಿಗೆ ಕೂತಂತೆ
ಈ ರಾತ್ರಿ ಇಂದೇ ಮುಗಿಯುವ ಹಾಗೆ ಕಾಣುತ್ತಿಲ್ಲ
ಅಲ್ಲಲ್ಲಿ ಅದೆಂಥದೋ ಅಬ್ಬರ
ಬೊಬ್ಬೆಯಿಡುತ್ತಿವೆ ನಾಯಿಗಳು
ಕೇಳಿಸುತ್ತಿದೆ ಯಾರೋ ಚೀರಿದಂತೆ
ಬೊಗಳುವ ನಾಯಿ ಕಚ್ಚದೆಂಬುದು ಬರೀ ಭ್ರಮೆಯೇ?
ಎಣಿಸಬೇಕೆನ್ನಿಸುತ್ತಿದೆ ನಕ್ಷತ್ರಗಳನ್ನೆಲ್ಲ
ನಿದ್ದೆಗೇಡನ್ನು ಸಾರ್ಥಕವಾಗಿಸಲು ಅದೊಂದೇ ದಾರಿ
ಆದರೆ ಎಣಿಸಿ ಎಣಿಸಿ ಯಾವ ಬುಟ್ಟಿಗೆ ಹಾಕುವುದು
ಈ ಫಳಫಳ ನಕ್ಷತ್ರಗಳ
ಬೆಳಗಾಗುವುದರ ಸುಳಿವೇ ಇಲ್ಲ
ನೋವನ್ನೇ ಒಡೆದಿಡುತ್ತಿರುವ ಈ ಸುಖದ ರಾತ್ರಿ
ಬಹುಶಃ ಕೊನೆಯಾಗುವುದೇ ಇಲ್ಲ.
ನೋವನ್ನೇ ಒಡೆದಿಡುತ್ತಿರುವ ಈ ಸುಖದ ರಾತ್ರಿ
ಬಹುಶಃ ಕೊನೆಯಾಗುವುದೇ ಇಲ್ಲ.
very nice