ಕೇಶವ ರೆಡ್ಡಿ ಹಂದ್ರಾಳ

ದೊರೆಗಳೆ ,ದೊರೆಗಳೆ , ರಾಜ್ಯವನಾಳುವ ದೊರೆಗಳೆ,

ರಾಷ್ಟ್ರವನಾಳುವ ದೊರೆಗಳೆ, ನಮ್ಮ ಮೊರೆಯನೂ ಒಂದಿಷ್ಟು ಆಲಿಸಿ ಪಾಲಿಸಿ

ದೊರೆಗಳೇ ನಿಜ ನಾವು ನೀವು ಸಾಕಿದ ಕುರಿಗಳೇ ..‌.!
ನೀವು ಮಾತ್ರ ನಾವು ಹುಟ್ಟಿಸಿದ ನರಿ ತೋಳಗಳೇ….!!

ಚಿನ್ನದ ಗಟ್ಟಿಗಳನ್ನೆಲ್ಲ ಪೇರಿಸಿಕೊಳ್ಳಿ ನಿಮ್ಮ ಹಟ್ಟಿಗಳಲ್ಲೆ;
ಉಳಿಸಿ ತಿನ್ನುವಷ್ಟು ಅನ್ನವನ್ನಾದರೂ ನಮ್ಮ ತಟ್ಟೆಗಳಲ್ಲೆ.

ತುಂಬಿಸಿಕೊಳ್ಳಿ ಬೇಕಾದರೆ ನೀವೇ ನಿಮ್ಮ ಪೀಪಾಯಿಗಳ ತುಂಬಾ ಬ್ರಾಂದಿ ವಿಸ್ಕಿಬೀರು ;
ಉಳಿಸಿ ಬಾಯಾರಿಸಿಕೊಳ್ಳಲು ನಮಗೂ ಒಂದಿಷ್ಟು ನೀರು.

ನೀವೇ ನಡೆಸಿ ಕಾರುಬಾರು ನುಂಗಿ ಎಕರೆಗಟ್ಟಲೇ ಭೂಮಿ ,ಕೆರೆ ,ಕುಂಟೆ ,ಕಾಲುವೆ ,ಜಹಗೀರು;
ಬಿಟ್ಟು ಬಿಡಿ ನಮ್ಮ ತಲೆಯ ಮೇಲೂ ಒಂದು ಸಣ್ಣ ಸೂರು ಸಂರಕ್ಷಿಸಿಕೊಳ್ಳಲು ನಮ್ಮ ನರಸತ್ತ ಬೇರು.

ಹರಡಿ ಹಾಸಿಕೊಳ್ಳಿ ಭೂಮಿ ಆಕಾಶದಲ್ಲೆಲ್ಲ ನಿಮ್ಮ ಸುಖದ ಸುಪ್ಪತ್ತಿಗೆ;
ನಮಗೂ ಬಿಡಿ ಕಾಲು ಚಾಚುವಷ್ಟಾದರೂ ಹಾಸಿಕೊಳ್ಳಲು ಹಾಸಿಗೆ.
ಆಗಸಕ್ಕೆ ಬೇಕಾದರೂ ಹಾಕಿಕೊಳ್ಳಿ ಏಣಿ ; ನಮಗೆ ನಿರಂತರ ತೂತು ಬಿದ್ದ ದೋಣಿ.

ಒಲಿಸಿಕೊಳ್ಳಿ ನೀವೇ ಎಲ್ಲಾ ಪಾಂಡಿತ್ಯ . ಧರ್ಮ , ದೇವರು , ಕಾನೂನು- ಕಟ್ಟಳೆ ಸದಾ ನಿಮ್ಮ ವಶ;
ಆಗದಿದ್ದರೆ ಸಾಕು ನಮ್ಮೆದೆಗಳಲ್ಲಿ ಕಾರುಣ್ಯ, ಶ್ರಮ , ಕರ್ಮ,ಸಂಸ್ಕಾರ ಸರ್ವ ನಾಶ…

ಖಾಲಿ ಮಾಡಿ ನೀವೆ ಕುಡಿ ಕುಡಿದು ಎಲ್ಲಾ ಅಮೃತ ಕಲಶಗಳನು ..
ಆದರೆ , ಪ್ಲೀಸ್ – ಪ್ಲೀಸ್ ಕದಿಯಬೇಡಿ ಬದುಕು ಕಲಿಸುವ ನಮ್ಮ ವಿಷದ ಬಟ್ಟಲುಗಳನು….
ಸತ್ತರೂ ಬದುಕಿಸುವ ವಿಷಾದ ಕನಸುಗಳನು…