ಅವಳ ಗಂಡ

ರೇಣುಕಾ ರಮಾನಂದ್ 

ಮುಖಪುಟ ಚಿತ್ರ : ಶಿವಶಂಕರ ಬಣಗಾರ್

ಹಳೆಗೆಳೆಯನ ನೆನಪಿಗೆ
ಉತ್ತು ಬಿತ್ತದ ಹೊಲದಲ್ಲೊಂದು
ಪುಟ್ಟ ಮಾವಿನ ಸಸಿ ನೆಟ್ಟೆ
ಮೂರೇ ವಷ೯ಕ್ಕೆ ಫಲವೆಂದು
ಮಾರಿ ಹೋದವನ ಮಾತುಳಿಸಲೆಂಬಂತೆ
ಭತಿ೯ ಅಷ್ಟೇ ದಿನಕ್ಕೆ
ಹೂ ಬಿಟ್ಟು
ಘಮಘಮಿಸಿತು ಗಿಡ
ಮರಿದುಂಬಿ ಕಿರಿದುಂಬಿ
ಹೆದ್ದುಂಬಿಗಳ ಜಾತ್ರೆಗೆ
ಬೆಚ್ಚಿಬಿದ್ದವು ಸುತ್ತಲಿನ
ಬಂಜರು ಗಿಡಮರ

ತಡವಾಗಿಯಾದರೂ
ತಲುಪಿತ್ತು ಹುಡುಗನಿಗೆ
ತನ್ನ ನೆನಪಿನ ಗಿಡಕ್ಕೆ
ಹೂಬಿಟ್ಟ ಸುದ್ದಿ
ಪುರುಸೊತ್ತು ಮಾಡಿಕೊಂಡು
ಹೆಂಡಿರು ಮಕ್ಕಳೊಂದಿಗೆ
ಅವ ಬರುವುದರೊಳಗೆ
ಮಿಡಿಮಾವುಗಳ ಸಂತೆ
ಗಿಡದ ತುಂಬ

ಸುತ್ತಿದರು ಎಲ್ಲರೂ
ಸುಡುವ ಮೊದಲು
ಸಿಂಗರಿದ ಹೆಣಕ್ಕೆ
ಅಂತಿಮ ಸಲಾಮು ಸಲ್ಲಿಸುವವರಂತೆ
ಮಿಡಿ ಮುರಿದು ಸೊನೆಗೆ
ಕಡ್ಡಿ ಗೀರಿದರು
ಉಗುರು ಕಪ್ಪಿಸಿ ನೋಡಿದರು
ಉಪ್ಪಿನಕಾಯಿಗೆ ಯೋಗ್ಯವೋ
ಹಣ್ಣಿಗೋ
ಕುದಿಸಿ ಜಾಡಿಗೆ ತುಂಬಿಡುವ
ಕುಸುರುಗಾಯಿಗೋ….

ಕಟ್ಟಿತ್ತು ನನ್ನ ಬಾಯಿ
ಶಿಲೆಯಾಗಿತ್ತು ದೇಹ
ಉಗುರು ಕಪ್ಪಿಸಿ ಚಮ೯ದ
ಪೆಡಸು ಪರಿಶೀಲಿಸುವಾಗ
ಸೊನೆಗೆ ಕಡ್ಡಿಗೀರುವಾಗ
ಇಂದೇ ಕೊಯ್ದರೆ
ಉಪ್ಪಿನಕಾಯಿಗೆ ಹದವೆಂಬ
ಒಕ್ಕೊರಲಿನ ಒಮ್ಮತಕ್ಕೆ
ತುಂಬು ಬಸುರಿ ಗಿಡದ
ಹೀಚುಗಾಯನ್ನೆಲ್ಲ ಕೊಯ್ದು
ಚೀಲ ತುಂಬುವಾಗ

ನಿಮಗೇ ತಿಳಿದಿರುವಂತೆ
ಅದು ಅವನದೇ ನೆನಪಿನ ಗಿಡ
ಹಕ್ಕುಂಟು ಅವನಿಗೆ
ಉಗುರು ಕಪ್ಪಿಸಲು
ಕಡ್ಡಿ ಗೀರಲು
ಪೆಡಸು ಪರಿಶೀಲಿಸಲು
ಕೊನೆಗೊಮ್ಮೆ
ಮಿಡಿಗಾಯಿ ಹರಿದು
ಚೀಲ ತುಂಬಲು

ನಿನ್ನ ಹಿಮ್ಮಡಿಯ ಬಿರುಕಿನಲ್ಲೂ
ಅದ್ಭುತ ಸೌಂದಯ೯ವಿದೆ ಎನ್ನುತ್ತಿದ್ದ
ಅವನೀಗ
ಅವಳ ಗಂಡ.