ಕಾಳಿಮುತ್ತು ನಲ್ಲತಂಬಿ 

 
ಕೊಲೆ
ಒಬ್ಬನನ್ನು
ಕೊಲೆ ಮಾಡಲು
ಬಹಳ ಉಪಾಯಗಳಿವೆ
ಅನ್ನದಲ್ಲಿ ಸ್ವಲ್ಪ
ವಿಷ ಬೆರಸಿಬಿಡಬಹುದು
ಒಂದು ಹಗ್ಗವ ಕೊರಳಿಗೆ ಸುತ್ತಿ
ನೇಣು ಹಾಕಬಹುದು
ಬೆನ್ನನ್ನು ಚಾಕುವಿನಿಂದ
ಇರಿದು ಬಿಡಬಹುದು
ದಾರಿಯಲ್ಲಿ ಒಂದು ವಿಪತ್ತಿಗೆ
ಗುರಿ ಮಾಡಬಹುದು
ನಿದ್ರಿಸುವಾಗ ದಿಂಬಿಂದ
ಮುಖವ ಅದುಮಿ ಉಸಿರ ನಿಲ್ಲಿಸಬಹುದು
ಎತ್ತರವಾದ ಕಟ್ಟಡದ ಮೇಲಿಂದ
ತಳ್ಳಿಬಿಡಬಹುದು
ಹೀಗೆ ಇನ್ನೂ ಎಷ್ಟೋ ದಾರಿಗಳ
ಕಂಡುಕೊಳ್ಳಬಹುದು
ಆದರೆ
ಕಹಿ ಮಾತುಗಳ ಜೇನಲ್ಲಿ ತೊಯ್ದು
ಎದೆಯೊಳಗೆ ಸುರಿಯುತ್ತಾರೆ
ಚೂಪಾದ ಭಾಷೆಗೆ ಬೆಣ್ಣೆ ಹಚ್ಚಿ
ಹೃದಯವ ಚುಚ್ಚುತ್ತಾರೆ
ಮುಳ್ಳಂತ ಪದಗಳಿಗೆ
ರೇಷ್ಮೆ ಉಡುಗೆ ತೊಡಿಸಿ
ಅಂದ ನೋಡುತ್ತಾರೆ
ಆಮ್ಲದಲಿ ಅದ್ದಿದ ಅಕ್ಷರಗಳ
ಮುಖದಮೇಲೆ ಎರಚುತ್ತಾರೆ
ಆದರೆ
ಮಾತುಗಳೋ ಬಹಳ ಜಾಣರು
ಅದ ಆಲಿಸಿದವರನ್ನು ಒಮ್ಮೆಯೂ
ಅದು ಅವಮಾನಗೊಳಿಸುವುದಿಲ್ಲ
ಆಡಿದವರ ಮಾತ್ರ ಆಸಹ್ಯಗೊಳಿಸದೆ
ಬಿಡುವುದೇ ಇಲ್ಲ
 
ಪರಸ್ಪರ ತುರಿಸಿಕೊಂಡೆವು
ಇಬ್ಬರು ಪರಸ್ಪರ
ಬೆನ್ನು ತುರಿಸಿಕೊಂಡೆವು
ಉಗುರ ಸಂದಿಯಲ್ಲಿ ರಕ್ತ
ಕೈಗಂಟಿದ ತೊಗಲಿನ ಚೂರುಗಳು
ನಮ್ಮ ಪ್ರೇಮದ ನವೆ ಶಮನವಾಯಿತು.
ಇಬ್ಬರು ಪರಸ್ಪರ
ಬೆನ್ನು ತುರಿಸಿಕೊಂಡೆವು
ಉಗುರ ಸಂದಿಯಲ್ಲಿ ರಕ್ತ
ಕೈಗಂಟಿದ ತೊಗಲಿನ ಚೂರುಗಳು
ನಮ್ಮ ಕವನಗಳು ಸಾರ್ಥಕವಾದವು.
ಇಬ್ಬರು ಪರಸ್ಪರ
ಬೆನ್ನು ತುರಿಸಿಕೊಂಡೆವು
ಉಗುರ ಸಂದಿಯಲ್ಲಿ ರಕ್ತ
ಕೈಗಂಟಿದ ತೊಗಲಿನ ಚೂರುಗಳು
ನಮ್ಮ ರಾಜಕೀಯದ ತೀಟೆ ತೀರಿತು.