ಒಂದು ಕವಿತೆ

ಟಿ ಎಸ್ ಗೊರುವರ

1
ನಿನ್ನ ವಾರೆಗಣ್ಣಿನ ಒಂದು ನೋಟಕ್ಕಾಗಿ
ಸವೆದು ಹೋದ ರಾತ್ರಿ, ಹಗಲಿಗೆ ಲೆಕ್ಕವಿಲ್ಲ
ಚೈತ್ರ ಪಲ್ಲವಿಸದ ಹಾಳು ದಿನಗಳು
ಒಂದಿನವೂ ನವಿಲು ಕುಣಿಯಲಿಲ್ಲ
ಮರೆತೇ ಹೋಗಿತ್ತು ಚೆಂದದ ಹಾಡು, ಹಬ್ಬದ ಬೆಳದಿಂಗಳು.
 
2
ಲೋಕದ ದಂದುಗಗಳೇ ನೂರೆಂಟು
ಹವಾ ಹಿತವಾಗಿಲ್ಲ, ತಂಗಾಳಿಯಲ್ಲೂ ಸೂಜಿಮೊನೆ
ಮನೆಯೊಳಗಿದ್ದೂ ಮನೆ ಮಂದಿಗೆ ಅಪರಿಚಿತರು ನಾವು
ಕ್ಷುಲ್ಲಕವಾಗಿದೆ ಮರದ ಸೊಬಗು, ಪಾತರಗಿತ್ತಿಯ ಸಂಭ್ರಮ
ಎಡವಿದ ವಸಂತನ ಕಾಲಿಗೆ ಮಾಯದ ಗಾಯವಾಗಿದೆ.
3
ಉದುರುವ ಎಲೆ ಉದರಿ ಹೋಗಲಿ
ಬಿಸಿಲೊಳಗಿನ ತುಸುವೇ ನೆರಳು ಸಾಕೆನಗೆ
ಗೊತ್ತಾಗುವುದಿಲ್ಲ ಲೌಕಿಕದ ರಾಜಕಾರಣಕ್ಕೆ
ಪ್ರೇಮದ ಧೂಳಿಯೂ ಧೂಮಪಾನ ಅದಕ್ಕೆ
4
ನಿನ್ನದೊಂದು ಮುಗುಳ್ನಗೆ, ಕಾಲ್ಗೆಜ್ಜೆಯ ಇಂಪು
ಮೋಡದ ಮುಕ್ಕು ಹನಿ, ಮಣ್ಣ ವಾಸನೆ
ಕಾಯುವ ದಣಿವಿಗಿಂತ ಮಿಗಿಲು ;
ಇಷ್ಟು ಸಾಕು ಜೀವಚೈತ್ರ ಪಲ್ಲವಿಸಲು.