ಅಭಿನಯದಲ್ಲಿ ಆಸ್ತಕಿ ಯಾರಿಗಿರಲ್ಲ ಹೇಳಿ. ಬೆಳ್ಳಿ ಪರದೆಯ ಮೇಲೆ ನಟನೆ ಮಾಡಬೇಕೆನ್ನುವುದು ಬಹಳ ಜನರ ಆಸೆಯಾಗಿರುತ್ತೆ, ಚಿತ್ರ ನಿರ್ಮಿಸುವುದು ಕನಸಾಗಿರುತ್ತೆ. ಹೀಗೆ ಅಭಿನಯದ ಗೀಳು ಹಚ್ಚಿಕೊಂಡಿರುವ ಬೆಂಗಳೂರಿನ ಕೆಲವು ಟೆಕ್ಕಿಗಳು ಒಂದು ತಂಡ ಕಟ್ಟಿಕೊಂಡು ‘ಅಭಿವ್ಯಕ್ತಿ’ ಎನ್ನುವ ಕಿರುಚಿತ್ರ ಮಾಡಿದ್ದಾರೆ. ಸಾಮಾಜಿಕ ಸಮಸ್ಯೆಯ ಮೇಲೆ ಬೆಳಕು ಚೆಲ್ಲುವ ಈ ಕಿರುಚಿತ್ರ, ತಂಡದ ಮೊದಲ ಪ್ರಯತ್ನ.
ಅದೇ ಕ್ಲಾಸ್, ಕಾರಿಡಾರು, ಬೆಂಚು, ಮೇಡಂ, ಸರ್ ಬೈಗುಳ, ಬ್ಯಾಕಾದ ಪೇಪರುಗಳು ಇಂಥಾ ಯಾವ ಗೋಜಿಗೂ ಈ ವಿದ್ಯಾರ್ಥಿಗಳು ಬಿದ್ದಿಲ್ಲ. ಎಂಜಿನಿಯರಿಂಗ್ ಓದುವಾಗ ಜೊತೆಯಲ್ಲಿ ನಟನೆ, ಕಾರ್ಯಕ್ರಮ ನಿರೂಪಣೆ ಅಂತೆಲ್ಲ ಸಂವಹನದ ನಾನಾ ಸಾಧ್ಯತೆಗೆ ತೆರೆದುಕೊಂಡಿದ್ದವರು ಈಗ ಉದ್ಯೋಗಮುಖಿಗಳಾದ ಮೇಲೆ ತಂಡಕಟ್ಟಿ ಏಳು ತಿಂಗಳ ಪರಿಶ್ರಮದಿಂದ 31 ನಿಮಿಷಗಳ ಕಿರುಚಿತ್ರ ನಿರ್ಮಿಸಿದ್ದಾರೆ. ಅಮಿತ್ ಕಶ್ಯಪ್ ಈ ಕಿರುಚಿತ್ರದ ಸೂತ್ರಧಾರ, ಅವರದೇ ಚಿತ್ರಕಥೆ,ಕಥೆ, ಸಂಭಾಷಣೆ,ನಿರ್ದೇಶನ, ಸಂಕಲನ, ಜೊತೆಗೆ ಮುಖ್ಯ ಪಾತ್ರದಲ್ಲಿ ನಟನೆ ಕೂಡ .ಚಿತ್ರದ ಲೊಕೇಶನ್- ಬೆಂಗಳೂರ ಸುತ್ತಮುತ್ತ. ಕಶ್ಯಪ್ ಜೊತೆ ನಳಿನಿ, ಅರುಣ್, ಪರೀಕ್ಷಿತ್ ಮೊದಲಾದ ಎಂಜಿನಿಯರಿಂಗ್ ವಿದ್ಯಾರ್ಥಿಗಳೂ ಈ ಕಿರುಚಿತ್ರದಲ್ಲಿ ಆಭಿನಯಿಸಿದ್ದಾರೆ.
ಯೂಟ್ಯೂಬ್ ಗೆ ಅಪ್ಲೋಡ್ ಮಾಡಿದ್ದೇ ತಡ ಹತ್ತು ಸಾವಿರಕ್ಕೂ ಹೆಚ್ಚು ಜನ ವೀಕ್ಷಿಸಿದ್ದಾರೆ. ವೀಕ್ಷಕರ ಮೆಚ್ಚುಗೆಯಿಂದ ಪುಳಕಿತವಾದ ತಂಡ ಇನ್ನಷ್ಟು ಇಂಥಾ ಕಿರುಚಿತ್ರ ನಿರ್ಮಾಣದತ್ತ ಹೆಜ್ಜೆಯಿಟ್ಟಿದೆ.
0 ಪ್ರತಿಕ್ರಿಯೆಗಳು