ಟಿ ಕೆ ತ್ಯಾಗರಾಜ್

ನಿನ್ನೆ ಪರಿಚಿತರೊಬ್ಬರು ಸಿಕ್ಕಿದ್ದರು. ‘ನೋಡಿ. ಅನ್ನ ಭಾಗ್ಯ ಯೋಜನೆ ಕಾರ್ಯಕ್ರಮದಲ್ಲಿ ಮುಸ್ಲಿಮರೇ ತುಂಬ ಇದ್ದಾರೆ’ ಅಂದರು. ನನಗೆ ಅವರ ಮಾತುಗಳು ಅಸಹ್ಯ ಹುಟ್ಟಿಸಿದವು.’ಬಡವರು ಯಾರಾದರೇನು? ಅಗತ್ಯ ಇದ್ದವರು ಬರುತ್ತಾರೆ. ಹೊಟ್ಟೆ ತುಂಬಿದವರಿಗೆ ಅವರ ನೋವು ಹೇಗೆ ತಾನೇ ಗೊತ್ತಾಗುತ್ತದೆ?’ ಅಂದೆ. ನನ್ನ ಪ್ರತಿಕ್ರಿಯೆಯಿಂದ ಅವರು ಅವಾಕ್ಕಾಗಿ ‘ನೀವು ಹೇಳೋದು ಸರಿ’ ಎಂದು ಸುಮ್ಮನಾಗಿಬಿಟ್ಟರು.
ಇನ್ನೊಬ್ಬರು ‘ಕೆ.ಜಿ.ಅಕ್ಕಿಗೆ ಒಂದು ರೂಪಾಯಿ ಬದಲು ಐದು ರೂಪಾಯಿ ಇಡಬೇಕಿತ್ತು. ಇನ್ನು ಏನೇನಾಗುತ್ತೆ ನೋಡ್ತಾ ಇರಿ. ಮನೆ ಕೆಲಸಕ್ಕೂ ಜನ ಸಿಗೋಲ್ಲ. ನಮಗೂ ಅಕ್ಕಿ ಕೊರತೆ ಆಗಿ ಸಿಕ್ಕದೇ ಹೋಗುವ ಸಾಧ್ಯತೆ ಇದೆ’ ಎಂಬ ಅನಗತ್ಯ ಕಳವಳ ವ್ಯಕ್ತಪಡಿಸಿದರು. ಅದಕ್ಕೆ ನಾನು, ‘ ನಿಮ್ಮ ಮನೆಗೆ ತರಿಸುವ ಅಡುಗೆ ಅನಿಲ, ನಿಮ್ಮ ಟೂ ವೀಲರ್ ನ ಪೆಟ್ರೋಲ್ ಎಲ್ಲದಕ್ಕೂ ಸಬ್ಸಿಡಿ ಕೊಡ್ತಿದೆ. ಅಡುಗೆ ಅನಿಲ ಸಿಲಿಂಡರ್ ಒಂದಕ್ಕೆ ಸರ್ಕಾರವೇ ಎಂಟು ನೂರು ರೂಪಾಯಿಗಳಿಗಿಂತ ಹೆಚ್ಚು ಸಬ್ಸಿಡಿ ಕೊಡ್ತಿದೆ. ಪೆಟ್ರೋಲ್ ಕೂಡಾ ಸಬ್ಸಿಡಿ ದರದಲ್ಲಿ ದೊರೆಯುತ್ತಿದೆ. ಸರ್ಕಾರದ ಈ ಭಿಕ್ಷೆಯನ್ನು ವಾಪಸ್ ಕೊಟ್ಟು ಇಂಥ ಮಾತುಗಳನ್ನಾಡಿ. ಮುಂದೊಂದು ದಿನ ನಮಗೇ ಅಕ್ಕಿಯ ಕೊರತೆಯಾಗುತ್ತದೆ ಎಂದು ಅನಗತ್ಯ ಆತಂಕ ವ್ಯಕ್ತಪಡಿಸುತ್ತಿದ್ದೀರಲ್ಲಾ? ಹುಟ್ಟಿನಿಂದ ಹಸಿವೇ ಬದುಕಾದವರು ಎರಡು ಹೊತ್ತು ಊಟ ಮಾಡುವುದಕ್ಕೆ ಸಿದ್ದರಾಮಯ್ಯ ತರಹದವರು ನಿರ್ಧಾರ ಮಾಡಿದ್ದಾರೆಂದರೆ ಸಂತೋಷ ಪಡಬೇಕು. ಅದು ಬಿಟ್ಟು ಈ ಪ್ರಲಾಪ ಏಕೆ? ಒಂದು ದಿನವೂ ಹಸಿವು ಸಹಿಸಿಕೊಳ್ಳಲಾಗದ ನಿಮಗೆ ವರ್ಷಗಳ ಕಾಲ ಹಸಿವಿದ್ದವರ ಬಗ್ಗೆ ಏನೂ ಅನ್ನಿಸುತ್ತಿಲ್ಲವೇ?’ ಎಂದು ಕಟುವಾಗಿಯೇ ಪ್ರಶ್ನ್ಸಿಸಿದೆ.

ವಿಚಿತ್ರ ಎಂದರೆ ಈ ಇಬ್ಬರೂ ತುಂಬ ಒಳ್ಳೆ ವ್ಯಕ್ತಿಗಳು. ಅವರಿಬ್ಬರಿಗೆ ನೋವುಂಟು ಮಾಡುವುದು ನನ್ನ ಉದ್ದೇಶವಾಗಿರಲಿಲ್ಲ. ಭಾರತೀಯ ಸಮಾಜದ ಅಸಮಾನತೆ-ಬಡತನದ ಕಾರಣಗಳು, ಅದರ ಪರಿಣಾಮಗಳು, ಇದ್ಯಾವುದರ ಬಗ್ಗೆಯೂ ಅವರಿಗೆ ಅರಿವಿರಲಿಲ್ಲ. ಮುಸ್ಲಿಮರ ಬಗ್ಗೆ ಸಂಘ ಪರಿವಾರ ಅರ್ಥಾತ್ ವೈದಿಕ ಮನಸ್ಸು ಸೃಷ್ಟೀಸಿರುವ ದ್ವೇಷದ ಸಮೂಹ ಸನ್ನಿ, ಸಲ್ಲದ ಗೊಂದಲಗಳಿಂದ ಅವರು ಈ ರೀತಿ ಮಾತನಾಡಿದ್ದರು. ಜಾತಿ ಬೇಡ ಅನ್ನುವವರ ಮಾತು ಸುಂದರವಾಗಿಯೇ ಕೇಳುತ್ತದೆ. ಆದರೆ ಅದು ಬೇರೂರಿರುವ ಪರಿ, ಅದರಿಂದ ಉಂಟಾಗುತ್ತಿರುವ ಅನಾಹುತಗಳು ಜನಸಾಮಾನ್ಯರಿಗೆ ಅರ್ಥ ಮಾಡಿಕೊಳ್ಳುವುದು ಸಾಧ್ಯವೇ ಇಲ್ಲ. ಉಳ್ಳವರು ಇಲ್ಲದವರನ್ನು ಸಲುಹಬೇಕಾದ ಮನುಷ್ಯನ ಮೂಲ ಲಕ್ಷಣಗಳಾದ ಪ್ರೀತಿ, ದಯೆ, ಕರುಣೆ, ಕಾಲಾಂತರದಲ್ಲಿ ಕಡಿಮೆಯಾಗುತ್ತಾ ಸ್ವಾರ್ಥವೇ ಬದುಕಾಗಿ ಎಲ್ಲವನ್ನೂ ತಾನೇ ಬಾಚಿಕೊಳ್ಳಬೇಕೆಂಬ ದುರಾಸೆ ಹೆಚ್ಚಾಗಿ ನಿಜ “ಮನುಷ್ಯ” ಈಗ ಅಳಿವಿನಂಚಿನಲ್ಲಿರುವುದೇ ಗೆಳೆಯರಿಬ್ಬರ ಈ ಮಾತುಗಳಿಗೆ ಕಾರಣ.
ಅಳಿವಿನಂಚಿನಲ್ಲಿರುವ “ಮನುಷ್ಯ”ನ ಉಳಿವಿಗಾಗಿ ನಾವೆಲ್ಲರೂ ಪ್ರಯತ್ನ ಮಾಡೋಣ. ಮುಸ್ಲಿಮರೂ ಸೇರಿದಂತೆ ಎಲ್ಲ ಬಡವರ ಬದುಕು ಬೆಳಕಾಗುವುದರಿಂದ ಮಾತ್ರ ಭಾರತ ಬೆಳಗುವುದು ಸಾಧ್ಯ.’ಅನ್ನಕ್ಕಾಗಿ ಕಳ್ಳತನ ಮಾಡಿದವನಿಗೆ ನನ್ನ ಆಡಳಿತದಲ್ಲಿ ಶಿಕ್ಷೆ ಇಲ್ಲ. ಯಾಕೆಂದರೆ ದೇಶದ ಪ್ರತಿಯೊಬ್ಬನಿಗೂ ಅನ್ನ ಕೊಡುವುದು ಸಾಧ್ಯವಾಗದಿದ್ದರೆ ಅಂಥವನಿಗೆ ಶಿಕ್ಷೆ ಕೊಡುವ ಅಧಿಕಾರವೂ ಇಲ್ಲ’ ಎಂದು ಅಪರೂಪದ ನಾಯಕ ಜಗಜೀವನರಾಂ ಅವರ ಮಾತುಗಳನ್ನು ಈಡೇರಿಸುವ ನಿಟ್ಟಿನಲ್ಲಿ ಕೇಂದ್ರದ ಯುಪಿಎ ಸರ್ಕಾರ ‘ಆಹಾರ ಭದ್ರತೆ ಕಾಯ್ದೆ’ ಜಾರಿಗೆ ತಂದು ಪ್ರತಿಯೊಬ್ಬರಿಗೂ ಅನ್ನದ ಹಕ್ಕನ್ನು ಕೊಟ್ಟಿದೆ. ಸಿದ್ದರಾಮಯ್ಯನವರೂ “ಅನ್ನ ಭಾಗ್ಯ ಯೋಜನ್” ಸಾಕಾರಗೊಳಿಸಿದೆ. ಈ ನಿರ್ಧಾರಗಳನ್ನು ಬೆಂಬಲಿಸಿ ಮುನ್ನಡೆಯೋಣ.