ಜಯಶ್ರೀ ಬಿ ಕದ್ರಿ

ಸೀರೆಯಂಚಿನ ನವಿಲು
ಬೇಲಿಯಂಚಿನ ಹೂವು
ಆರತಿಯ ತಟ್ಟೆಯಲಿ
ಉರಿದು ಹೋಗುವ ತೈಲ
ಅಂಚಿನಲ್ಲಿರುವುದು ಸುಲಭವಲ್ಲ

ಮೆತ್ತನೆಯ ಮಲ್ಲಿಗೆಯ
ಹಾರ ಪೊರೆಯುವ ದಾರ
ಮಡಿಲ ಕೌದಿಯಲವಚಿ ಮರಗುವ
ಪೊರೆಯುವ ಮಾತೆ
ಅಂಚಿನಲ್ಲಿರುವುದು ಸುಲಭವಲ್ಲ

ಕೊನೆಯ ಸಾಲಲಿ ಕುಳಿತು
ಕೈಯ ಬೀಸುವ ಒಲವು
ತಿಳಿಗೊಳದ ಮನದಲ್ಲಿ
ಮುಗುಳು ನಗುವಾ ಚೆಲುವು
ಅಂಚಿನಲ್ಲಿರುವುದು ಸುಲಭವಲ್ಲ

ದೇಶ ಭಾಷೆಯ ಗಡಿಯ
ಜಾತಿಮತ ಬಣ್ಣಗಳ
ಅಂಚಿನಲ್ಲಿರುವುದು
ಸುಲಭವಲ್ಲ