ಪ್ರೇಮ್, ಬೆಂಗಳೂರು
೧
ರಂಗೋಲಿ ಬಿಡಿಸಿದಂತೆ
ನನ್ನ ಎದೆಯಂಗಳದಲ್ಲಿ
ನೂರಾರು ಹುಡುಗರ ಹೆಜ್ಜೆಗುರುತುಗಳು
ಕೆಂಪು ಚಿತ್ತಾರದಂತೆ ಹೊಳೆಯುತ್ತಿರುವ
ಆ ಜೋಡಿ ಹೆಜ್ಜೆಗಳಿವೆಯಲ್ಲ
ಅವು ನಾನು ಕದ್ದು ಮುಚ್ಚಿ ಪ್ರೀತಿಸಿದ
ನನ್ನ ಮೊದಲ ಗೆಳೆಯನ ಪಾದಗಳ ಗುರುತು
ಅಳಿಸಿದರೆ ಅಳಿಯಲೊಪ್ಪದ ಗಾಯದಂತೆ
ಅದರಿಂದ ರಕ್ತ ಜಿನುಗುತ್ತಲೇ ಇರುತ್ತದೆ…
೨
ಸಮುದ್ರ ಗಂಡು
ನದಿಗಳೆಲ್ಲ ಹೆಣ್ಣು
ಎನ್ನುವ ಮನುಷ್ಯರ ನಿಯಮ ಮೀರಿ
ಅಮಾಯಕ ಗಂಡು ನದಿಯೊಂದು
ಹರಿದು ಕಡಲು ಸೇರಿತು
ಇಲ್ಲ ಎನ್ನದೆ ಕಡಲು
ನದಿಯನ್ನು ತನ್ನ ಬಾಹುಗಳಲ್ಲಿ
ತುಂಬಿಕೊಂಡಿತು !
೩
‘ಇಬ್ಬರು ಹುಡುಗರು
ಪರಸ್ಪರ ಪ್ರೀತಿಸುವುದೆಂದರೆ
ಹೂವು-ಹಣ್ಣು ಬಿಡದ ಮರವೊಂದರ
ಆಶ್ರಯ ಪಡೆದಂತೆ…’
ಹಿರಿಯರು ಬುದ್ಧಿ ಮಾತು ಹೇಳಿದರು
ಹೂವು-ಹಣ್ಣು ಬಿಡದಿದ್ದರೇನಾಯಿತು ?
ಮರದಡಿಯ ನೆರಳ ತಂಪಿನಲ್ಲೇ
ಆ ಹುಡುಗರು
ನೂರುವರ್ಷ ಬಾಳಿದರು !
೪
ಇಬ್ಬರು ಹುಡುಗರ
ಮೊದಲ ಭೇಟಿಯಲ್ಲೆ ಪ್ರೀತಿ
ಸಂಭವಿಸಿ ಬಿಟ್ಟಿತು
ತೀರ್ಪು ಹೇಳುವ ನ್ಯಾಯಾಧೀಶರೇ
ಹುಡುಗರಿಬ್ಬರು ನಿರಪರಾಧಿಗಳು
ತಪ್ಪಾದ ನೆಲದಲ್ಲಿ ಪ್ರೀತಿ ಬಿತ್ತಿದ
ದೇವರನ್ನು ಶಿಕ್ಷಿಸಲು ನಿಮಗೆ ಸಾಧ್ಯವೇ ?
ಇಷ್ಟಕ್ಕೂ ಅದು ತಪ್ಪಾದ ನೆಲವೇ ಆಗಿದ್ದರೆ
ಅಲ್ಲಿ ಪ್ರೀತಿ
ಮೊಳಕೆ ಒಡೆದದ್ದಾದರೂ ಹೇಗೆ !?
೫
ಜಗತ್ತಿನ ಎಲ್ಲ ಧರ್ಮಗಳು
ಒಂದಾಗಿ ಗೇ ಗಳ ವಿರುದ್ಧ
ತೀರ್ಪು ನೀಡಿವೆ !
ಆದರೂ ನಮಗೆ ಹೆಮ್ಮೆಯಿದೆ
ಕ್ರಿಸ್ತನ ಶಿಲುಬೆಗೇರಿಸಿದವರು
ಗೇ ಗಳಲ್ಲ
ಪ್ರವಾದಿಗೆ ಕಲ್ಲೆಸೆದವರು
ಗೇ ಗಳಲ್ಲ
ಬಸವಣ್ಣ, ಶರಣಾದಿಗಳ ಕೊಂದವರು
ಗೇ ಗಳಲ್ಲ !!
ಈ ಜಗತ್ತಿನ ಮಹಾತ್ಮರೆಲ್ಲರೂ
ಪ್ರೀತಿಸಿದ ಕಾರಣಕ್ಕೆ
ಶಿಕ್ಷಿಸಲ್ಪಟ್ಟರು ಎನ್ನುವ
ಕಹಿ ಸತ್ಯ ನಮಗೆ ನೆನಪಿದೆ !
ಪ್ರೀತಿಯನ್ನು ದ್ವೇಷದ ಮೂಲಕ
ಒರೆಸಿ ಹಾಕುವುದು ಸುಲಭವಿಲ್ಲ
ಎನ್ನುವುದೂ ನಮಗೆ ಗೊತ್ತಿದೆ !!
೬
ಹುಡುಗನೊಬ್ಬ
ಹುಡುಗಿಯ ಇಷ್ಟಪಟ್ಟಾಗ
ಪ್ರೇಮ, ಒಲವು, ಇಷ್ಕ್ ಎಂದೆಲ್ಲ
ಬಣ್ಣಿಸಿದವರು
ಹುಡುಗನೊಬ್ಬ ಹುಡುಗನ
ಇಷ್ಟ ಪಟ್ಟಾಗ
ಸಲಿಂಗ ಕಾಮಿಯೆಂದು
ಒಂದೇ ಪದದಲ್ಲಿ ತೀರ್ಪು ಕೊಟ್ಟು
ಅವನ ಪ್ರೇಮ, ಒಲವು, ಇಷ್ಕ್
ಇತ್ಯಾದಿಗಳನ್ನು
ಕೊಂದು ಹಾಕಿದರು !!
೭
ನನ್ನ ಮುಂದೆ
ಒಂದೊಂದೇ ಬಟ್ಟೆ ಕಳಚಿ
ಬೆತ್ತಲಾಗುತ್ತಿರುವ ನನ್ನ ಹುಡುಗನೇ…
ಜೊತೆಗೆ ಆ ನಿನ್ನ
ಮುಖವಾಡ, ನಕಲಿ ಹೆಸರುಗಳನ್ನೂ
ಕಳಚಿಟ್ಟರೆ
ನಿನ್ನ ನಗ್ನತೆ ಪೂರ್ಣತೆಯನ್ನು
ಪಡೆಯುತ್ತದೆ….
ನನ್ನ ನಿನ್ನ ಪ್ರೀತಿಗೆ
ಅರ್ಥ ಬರುತ್ತದೆ.. !
೮
ಗುಲಾಬಿ ಗಿಡದ ಮುಳ್ಳುಗಳಂತೆ
ನನ್ನ ಹುಡುಗನ ಕುರುಚಲು ಗಡ್ಡ
ನನ್ನ ಕೆನ್ನೆಯನ್ನು ತರಚಿದೆ …
ಅವನ ಗುಲಾಬಿ ಮೊಗ್ಗಿನಂತಹ
ತುಟಿಯನ್ನು ತಲುಪಬೇಕಾದರೆ
ಈ ಮುಳ್ಳುಗಳನ್ನು ದಾಟಿಯೇ ಹೋಗಬೇಕು !
೯
ಜಗತ್ತನ್ನು ಎದುರಿಸಲಾಗದೆ
ಆ ಸಾರ್ವಜನಿಕ ಶೌಚಾಲಯದ ಮರೆಯಲ್ಲಿ
ನಾವು ಜೊತೆಯಾದ ದಿನ
ಗೋಡೆಗಳ ಮೇಲೆ ಚಿತ್ರಿಸಲ್ಪಟ್ಟ
ಅಶ್ಲೀಲ ಸಂದೇಶಗಳು ,
ಬೆತ್ತಲೆ ಗೆರೆಗಳ ಜೊತೆ
ಗೀಚಲ್ಪಟ್ಟ ಅನಾಮಿಕ ದೂರವಾಣಿ ಸಂಖ್ಯೆಗಳು
ಗಬ್ ಎಂದು ರಾಚುತ್ತಿದ್ದ ಆ
ಮಲ ಮೂತ್ರಗಳ ದುರ್ವಾಸನೆಗಳ ನಡುವೆ
ಕತ್ತಲಿಗೆ ಬಿಟ್ಟ ಟಾರ್ಚ್ ಲೈಟುಗಳಂತಿದ್ದ
ಹಸಿದ ಕಣ್ಣುಗಳು
ನಮ್ಮನ್ನು ತಿಂದು ಹಾಕುವಂತೆ
ನೋಡುತ್ತಿರುವಾಗ
ಮೈಥುನದ ಮೂಲಕ
ನಾವು ಪರಸ್ಪರ ವಿಸರ್ಜಿಸಿದ್ದು
ಈ ಜಗತ್ತಿನ ಕುರಿತ ಅಸಹ್ಯವನ್ನೇ ಅಲ್ಲವೇ ?
ನಮ್ಮ ನಡುವೆ ಉಸಿರಾಡುತ್ತಿದ್ದ
ನವಜಾತ ಶಿಶುವಿನಂತಹ ಪ್ರೇಮವನ್ನು
ಉಸಿರುಗಟ್ಟಿಸಿ ಕೊಂದದ್ದು
ಆ ಶೌಚಾಲಯದಲ್ಲೇ ಅಲ್ಲವೇ ?
0 ಪ್ರತಿಕ್ರಿಯೆಗಳು