ಮಹಾಂತೇಶ ಪಾಟೀಲ

**

೧.

ಅವಳ ಉಲ್ಲಾಸದ ವಾಸನೆ 

ಕುಡಿದ ಮುದುಕನೊಬ್ಬ

ಇಳಿಹೊತ್ತಿನಲ್ಲಿ ಸಲೂನ್ ಶಾಪಿನಿಂದ

ಹೊರಬರುವಾಗ ಥೇಟ್ 

ವಿರಾಟ್ ಕೊಹ್ಲಿಯ ಖದರು

೨.

ಅಜ್ಜಾ ಮೂವತ್ತು ವರ್ಷದ 

ಮಧುಮೇಹಕ್ಕೇನು ಮುದ್ದು ? ಕೇಳಿದೆ

ಖಾಲಿ ಹೊಟ್ಟೆಯಲ್ಲಿ 

ಅವಳ ನಗು ಕುಡಿಯುತ್ತೇನೆ

ಅವಳ ಚಿತ್ರದ ಬೆನ್ನಟ್ಟಿ ನಡೆಯುವೆ

ಉಪವಾಸದ ಮೊದಲು, ಊಟದ ನಂತರ  

ಮಲಗುವ ಮೊದಲು

ಮೆಲುಕಾಡುವೆ ಅವಳ ಮರ್ಮರ.

ರಕ್ತದೊತ್ತಡಕ್ಕೇನು ಮಾಡುವೆ ಅಜ್ಜ:

ದೀರ್ಘವಾಗಿ ಒಳಗೆಳೆಯುವೆ 

ಅವಳ ಉಸಿರ ವಾಸನೆ.

ಹೊರಗೆ ಬಿಡುವೆ

ನಿಡುಗಾಲದ ನಿಟ್ಟುಸಿರನು.

ಕುಡಿಯುವೆ, ತಿನ್ನುವೆ, ನುಂಗುವೆ..

ಜೀವದ ಜೀರ್ಣೋದ್ಧಾರಿಣಿಯ

ಅವಳ ಲವಲವಿಕೆಯ ಚಿಗುರು, ಮೊಗ್ಗು, ಹೂ, ಹಣ್ಣು, ಬೀಜಗಳ ಕಷಾಯವನು

ಭಾವ ಬೆಳೆದ ಅಮೃತಬಳ್ಳಿಯನು.

೩.

ಈ ಹುಡುಗರು

ಯಾಕಾದರೂ ಕುಡಿಯುತ್ತಾರೋ?

ಚಿಟ್ಟೆಗಳ ರಕ್ತ, ಪಾರಿವಾಳಗಳ ಜೀವ;

ಅವರ ಮೀಸಲು ಮೌನ, 

ನಗು, ಉಲ್ಲಾಸ, ಒಲವುಗಳು 

ಎದೆಯಲ್ಲಿ ಹೆಪ್ಪುಗಟ್ಟಲು ಬಿಟ್ಟು.