ವಿಶಾಲ್ ಮ್ಯಾಸರ್ 

**

ಈ ನಿಕಶಕ್ಕೊಳಪಟ್ಟ ನಿದ್ರೆ

ಅದೆಲ್ಲೋ ಯಾವಾಗಲೋ 

ಬಂದು ಬಾಣ ಬಿಡುವ ಮುನ್ನ

ಯಪ್ಪಾ ಅದು ಶತಮಾನದ ಸುಸ್ತು 

ಹೊತ್ತು ಗೊತ್ತೆಂಬುದಿಲ್ಲ

Titanus ಕಾಯಿಲೆಯು

ಬಿಲ್ಲಂತೆ ದೇಹವನ್ನು ಬಾಗಿಸುವಂತೆ 

ಹಿಗ್ಗಿಸುವಂತೆ 

ಮಯ್ಯಮೂಳೆಯಲ್ಲ ಚಳಕುಟ್ಟಿ 

ಇದು ಬರೀ ಬೆಳಗಲ್ಲೋ ತಮ್ಮ

ಬರಿಯ ನಿದ್ರೆಯು ಅಲ್ಲವಣ್ಣ 

ಹಗಲು ರಾತ್ರಿ ಕಣ್ಣಿಗೆಣ್ಣೆ ಬಿಟ್ಟು ಕನಸಿದವರಿಗೆ ಅದೊಂದು

ಅನುಭೂತಿ 

ಅರೆ ತೆರದಿದ್ದ ಕಣ್ಮಲರ್ 

ಅದೆಷ್ಟು ಪುರಾತನರು ಕೆರ ಹೊತ್ತುತಂದು ಕಣ್ಣಿಗೆ

ತೊಡಸಿದರೋ 

ಇದು ಹರಳಯ್ಯನ ಮೊಮ್ಮಕ್ಕಳ ಅಡಿಗಡಿಗು ಬೆವತು 

ಚರ್ಮ ಕಿತ್ತು ಮಾಡಿದ ಚಮ್ಮಾವುಗೆ 

ಈ ಕತ್ತಲೆಯ ರಾಜ್ಯಕ್ಕೆ

ನಮ್ಮ ಮಂಟೆಸ್ವಾಮಿ

ಹೆಗಲ ಮೇಲೆ ಬೆಳಕು ಹೊತ್ತು ತಂದಂತೆ ನಿದ್ರೆ ಬಂತಂತೆ

ಮಾಚಿದೇವನೇ ಕಾಯವ ಹೊಗೆದೊಗೆದು ನೀಟಾಗಿ ಇಸ್ತ್ರಿ

ಮಾಡಿ ತೊಡಲು ರೆಡಿ ಮಾಡಿದ

ಅಂಬಾಪಾಲಿ ನೀನೆಲ್ಲೋ ಮನಗಿದ್ದಾಗ ಎಚ್ಚರ ಬಂದು 

ಎಡವಿತ್ತಂತೆ ಹೌದೆ

ನಿನಗತ್ತಿದ ಅರ್ಧ ನಿದ್ರೆಯನ್ನದರು ಕಳಿಸು ವೇಸಾಲಿಗಷ್ಟು

ಆರಾಮ ಕೊಡು

ಸಾಕು ಸಾಕಾಗಿದೆ 

Rapha ದಲ್ಲಿ ಅದೆಶ್ಟು ಮಂದಿ ಚಿರನಿದ್ರೆಗೆ ನಡೆದರೋ 

ಕೊಲ್ಲುವವರ ಬಂದುಕಿಗೀಟು ನಿದ್ರೆ ಕೊಡು ಪ್ರಭುವೆ ಅವರ

ಕನಸಲ್ಲಿ ಕೊಂದ ಮಕ್ಕಳು ಕಿಲಕಿಲ ನಕ್ಕ ಅತ್ತ ಉಚ್ಚೆ ಹೊಯ್ದ

ದೃಶ್ಯ ಬರಲಿ

ತಮ್ಮ ಮುಂದಿನ ಮಕ್ಕಳು ಹೇಲಲು ಕೊಂಚ ರಕ್ತವಿರದ ಜಾಗ

ಕರುಣಿಸು 

ಅಲ್ಲಿ ರಾತ್ರಿಯಲ್ಲಿ ಎಲ್ಲರಿಗು ತಣ್ಣಗಿನ ಆರಾಮ ಹತ್ತಿದಾಗ 

ನರಳಾಟ ಕಾಡಲಯ್ಯ 

ಗಾಜಾ ಪಟ್ಟಿಯಲ್ಲಿರುವರಿಗೆ 

ಬೇಡಿದ್ದಲ್ಲ ಬೋಗಸೆ ತುಂಬಿ ಕರುಣಿಸು ದೇವ 

ಕೊಂದರವನು ಸತ್ತವರನ್ನು ಒಂದೇ

ಮಣ್ಣಲಿ ಇಳಿಸುವಾತನೆ 

ನಿನಗೊಂದು ಪ್ರಾರ್ಥನೆ 

ಅಯ್ಯೋ ಟ್ಯಾಂಕರಿಗೆ

ಹಸಿವಾಗಿತ್ತು ಇನ್ನೇನು ಊಟವು ಮುಗಿದಿದೆ 

ನಿದ್ರೆ ಬರಲಿ ಹೋಗಜ್ಜ ಅವುಗಳ ಕಿವಿಗೆ ಒಂದೀಟು ತಂಬೂರಿ

ಮೀಟು ಶರೀಫಜ್ಜ 

ಅಯ್ಯಾ ಅಂಬಿಗ ನಿನ್ನ ನಂಬಿದೆನಯ್ಯ 

ದಡ ಸೇರಿಸು ದೇವ

ನನಗಷ್ಟು ಅಂಬೆಯ ರಸ ಕರುಣಿಸಿ ಸಾಕ್ಷಾತ್ಕಾರದ ಅನುಭಾವ

ನೀಡೋ..!

ಪರರ ನೋವು

ಪರದೇಶದ ಹಸುವು

ಚನ್ನ ಮಲ್ಲಿಕಾರ್ಜುನ

ನಿನಗೆಲ್ಲವು ಕಾಡಲಿ ಅಷ್ಟೇ

ಇದು ಯಾರ ಕನಸು  

ಬಯಲನೆ ಅಲಯವೆಂದ 

ಕದಳಿಯ ಗುಹೆ ಹೊಕ್ಕ 

ಪ್ರಭುದೇವರ ಕನಸು

ಗುಹೇಶ್ವರ ಎನ್ನ ಕಾಯವ ದಂಡಿಗೆಯ ಮಾಡಯ್ಯ

ಅವ್ವಾ ಪುಣ್ಣ್ಯಂಗನೆಯರೇ 

ನೀವು ದೇವನೊಂದಿಗೆ ಮಲಗುವಾಗ ನನ್ನಬಳಿಗೂ ಚೂರು

ಹೋಗಲು ಹೇಳಿರೆ 

ನಿಮ್ಮ ಮಗನಿಗಷ್ಟು ನಿದ್ರೆ ಕರುಣಿಸಿರಿ

**

ದಾರ್ಶನಿಕ ಕವಿ ಎಚ್ ಶಿವಪ್ರಕಾಶರು ತಮ್ಮ ಒಂದು ಪದ್ಯದಲ್ಲಿ ಆಮ್ರಪಾಲಿಗೆ ಅಂಬಾಪಲಿ ಹಾಗೂ ವೈಶಾಲಿಗೆ ವೇಸಾಲಿ ಎಂಬ ಪದ ಪ್ರಯೋಗ ಮಾಡಿದ್ದಾರೆ ಅದರ ಪ್ರಭಾವವನ್ನು ನಾನಿಲ್ಲಿ ನೆನೆಯುತ್ತೇನೆ.