ನಿನ್ನ ನದಿಯಾಗುವೆ..

ಅಕ್ಷತಾ ಕೃಷ್ಣಮೂರ್ತಿ

ಮನಸು ಕುಣಿಯಿತು
ಹಠಾತ್ತನೆ ನನ್ನೆದುರಿಗೆ ಬಂದು ನಿಂತೆ
ಬಹಳ ಪರಿಚಯ ಎಂಬಂತೆ ನಗೆ ಬರೆದೆ
ಇಂಚಿಂಚು ಮಾತಾಡಿ ಅಳೆದೆ
ನಾನೂ…….
ಎತ್ತರ ದಪ್ಪ ತೂಕ ನೀಳಕಾಯ
ಎಲ್ಲ ಬರೊಬ್ಬರಿ ಇದೆ

ಬಹಳಷ್ಟು ಜನ ಬಂದು ಹೋಗಿದ್ದರು ಬಿಡು
ಚೀಟಿ ಕೊಟ್ಟವರು ಮಿಸ್ ಕಾಲ್‌ನವರು
ಗುಲಾಬಿ ಕೊಟ್ಟವರು ಕಳ್ಳ ನೋಟದವರು
ಕಣ್ಣು ಹೊಡೆದು ಬರುತ್ತೀಯಾ ಎಂದವರು

ಯೋಚಿಸುತ್ತಿದ್ದೇನೆ, ನಿನ್ನಂತಿರಲಿಲ್ಲ ಅವರೆಲ್ಲರೂ.

ಕೆನ್ನೆಯಲಿ ಗುಳಿ ಬಿದ್ದು ಕಿರುನಗೆಯ
ಧಿಮಾಕಿನವನು ನೀನು
ನೀಲಿ ಕಣ್ಣಿನ ತೆಳು ತುಟಿ
ಗುಂಗುರು ಕೂದಲು ಆಗಾಗ ಮೇಲೆ ಸರಿಸುತ್ತ
ಕುತ್ತಿಗೆಯ ಚೂರು ಅಲ್ಲಾಡಿಸಿದರೆ ಸಾಕು
ಗಾಳಿಯೂ ನಿಂತು ಮೋಹಿಸಿಬಿಡುವ ತಾಕತ್ತು
ಉದ್ದ ತೋಳಿನ ಅಂಗಿಯ ಕೈ ಮೊಣಕೈವರೆಗೆ
ಅರ್ಧ ಮಡಚಿ ಹೊಂದಿಸುವ ನಿನ್ನ ರೀತಿ
ಮನಸ್ಸನ್ನೆ ಬೇಟೆಯಾಡಿತ್ತು ಕಪ್ಪಗೆ ದಪ್ಪಗೆ
ಇರುವ ನಿನ್ನ ಕೈ
ಬೆನ್ನು ಎದೆ ಮೇಲಿನ ರೋಮದಲ್ಲೆಲ್ಲ
ಒಲವಿನವತಾರಗಳು ಕಾಣುತ್ತಿತ್ತು

ನನಗನಿಸುತ್ತದೆ ಬಹುಬಾರಿ
ನಿನ್ನ ಕೂಡಿದ ಹುಬ್ಬುಗಳ ದಟ್ಟ ಕೂದಲ
ಮೇಲೆಲ್ಲ ನನ್ನ ಹೆಸರಿದೆ
ಉದ್ದ ಉಗುರಿನ ಕೋಲು ಬೆರಳಲ್ಲಿ
ಕನಸಿನುಂಗುರವಿದೆ

ಬಯಸುತ್ತದೆ
ನಿನ್ನ ಮೀಸೆಯ ಕೂದಲಿಂದಲೇ
ಚುಚ್ಚಿಸಿಕೊಂಡು ಮೈ ಪೂರಾ
ಮುತ್ತಿನ ಹಚ್ಚೆ ಹಾಕಿಸಿಕೊಳ್ಳಬೇಕೆಂದು
ಈ ಮೌನ ಕಾನನದ ಹಾದಿಯಲ್ಲಿ ನಿನ್ನ
ಉದ್ದ ಬಾರೀಕು ಕಾಲಿನ
ಹೆಜ್ಜೆಯೊಡನೆ ನಡೆಯಬೇಕೆಂದು

ಅಂತಾದರೆ
ನೀನೀಗ ನನ್ನೆದೆಯ ಉತ್ತಮ ಪುರುಷ