ಭಾರವಾಗಿದೆ
ಕಾಫಿಕಪ್
ಖಾಲಿಯಿದೆ ಕುರ್ಚಿ

–

ಸ್ಟ್ರಾಂಗ್ ಕಾಫಿ
ಮುಗಿದಮೇಲೂ ಉಳಿದೇಬಿಡುತ್ತದೆ
ಗಾಢ ನೆನಪು

–

ಈ ಸಂಜೆ ಎಂದಿನಂತಿಲ್ಲ
ಈ ನೀರವ ಮೌನ ಎಂದಿನಂತಿಲ್ಲ
ಏನೋ ಮರೆತಿದ್ದೇವೆ ಎಂದಿನಂತೆ ನೆನಪಾಗುತಿಲ್ಲ

–

ಕೋಗಿಲೆಗೆ ವಸಂತನ ನಿರೀಕ್ಷೆ
ಅಡಗಿ ಕುಳಿತಿವೆ ಮರೆಯಲಿ
ಲೆಕ್ಕವಿಲ್ಲದಷ್ಟು ಬಿಕ್ಕುಗಳು..

–

ಕದ್ದಿಂಗಳ ರಾತ್ರಿ ಬೆಳದಿಂಗಳ ಕನಸಿದವಳಿಗೆ
ಮುಂಜಾವು ಮೋಡದ ಮರೆಯಲ್ಲಿ
ಸೂರ್ಯ ಪೂರ್ಣಚಂದಿರ

–

ನಾವು ಲಾಸ್ಟ್ ಬೆಂಚ್ ಹುಡುಗರು
ಬದುಕು ಹಠಮಾರಿ ಟೀಚರ್
ಅರ್ಥಮಾಡಿಸುತ್ತಲೇ ಇರುತ್ತದೆ..

–

ಎಚ್ಚರವಾಯಿತು
ಮರದೊಳಗಿಂದ ಹಕ್ಕಿಯ ಕಿಚಪಿಚ
ಆಹ್ ಬದುಕಿದ್ದೇವೆ ಇಬ್ಬರೂ..

–

ಇರುಳಿಡೀ ಉರಿಸುತ್ತೇನೆ
ಜೋಡಿ ದೀಪ
ಕಣ್ಣೀರು ಕರೆಗಟ್ಟುತ್ತದೆ

–

ಮಂಜು ಸುರಿವ ಇರುಳು
ಕಿಟಕಿಯಲ್ಲಿ ಮಿಣುಕು ಬೀದಿದೀಪ
ಚಂದ್ರನ ಪ್ರತಿರೂಪ

–

ಜೀವದಾಯಿನಿಯಿಂದಲೇ ಜೀವಹಾನಿಯೂ
ನೇಹ ನೇಯುವ ಕೈ
ನೋವ ಒರೆವಂತೆ