ಅಂತರಾಳ

-ಎಚ್ ಕೆ ಶರತ್

ಮರಳ ಅರಳಿನೊಳು
ಅವಿತಿರುವ ಕಾವು
ಅರಿಯಬಲ್ಲದು
ತಾಯಿ ಆಮೆಯ ನೋವು
 
ದವಾಖಾನೆಯ ಯಂತ್ರದೊಳು
ಅಡಗಿರುವ ಕ್ರೌರ್ಯ
ಭ್ರೂಣದೆದುರು ತೋರಬಲ್ಲದು
ತನ್ನ ಶೌರ್ಯ
 
ಬಹುಮಹಡಿ ಕಟ್ಟಡಕ್ಕೆ
ಪಾಯ ತೋಡಿದ ಕೈಗಳು
ಬಿಕ್ಕಿ ಬಿಕ್ಕಿ ನಗಬಲ್ಲವು
ಮಹಾನಗರದ ಔದಾರ್ಯ ಕಂಡು
 
ಗ್ಯಾರೇಜಿನ ಆಯಿಲ್ಲು ಗ್ರೀಸಿನ ನಡುವೆ
ಅರಳಿದ ನರಳಿದ ಕೆರಳಿದ ಬದುಕು
ನಿರ್ಲಕ್ಷಿಸಬಲ್ಲದು
ಜಗದ ಥಳುಕು ಬಳುಕು
 
ಮೇಲ್ಮುಖದ ಒಡಲೊಳಗೆ
ಅಸಂಖ್ಯ ತವಕಗಳು
ಒಳಮುಖದ ಎದೆ ಮೇಲೆ
ಮೆಲ್ಲಗೆ ಕರಗುವ ಪುಳಕಗಳು