ಮಮತ ಅರಸೀಕೆರೆ

ಎದೆಯ ಮೇಲೆ ಮಲಗಿಬಿಡು
ಒಳ್ಳೆ ನಿದ್ದೆ ಬರಲಿ
ಕಣ್ಣಂಚಿನ ಹನಿಯು ಕರಗಿ
ಕನಸ ಹೆಣೆದು ತರಲಿ
ಕೆಂದುಟಿಯ ಮೇಲಿರಲಿ
ಮಾಯದಂತ ಮುಗುಳ್ನಗೆ
ಕಾರಿರುಳು ಸರಿದು ಬಿಡಲಿ
ಅಳಿಸದಂತೆ ಕಾಡಿಗೆ
ಸಹನೆಯ ಕವಚ ತರಿಸು
ಸೂರನೊದಿಸು ಮೆಲ್ಲಗೆ.
ನಕ್ಷತ್ರದ ಮಾಲೆ ನಿನಗೆ
ಚಂದ್ರನದೇ ಪದಕ
ಬಾಂದಳದ ಮೋಡಗಳು
ಭಾರ ಇಳಿಸೊ ತನಕ
ಆಕಾಶದ ಕಾಯಗಳಿಗು
ಒಲವ ಹರಿಸೊ ತವಕ
ಆಸೆಗಳ ಲೆಕ್ಕ ಹೇಳು
ಪಿಸುಗುಡಲಿ ಹೃದಯ
ಅಳದಂತೆಯು ಇರಬಹುದು
ತಿಳಿಯಾಗೋ ಬಗೆಯಾ
ಕುದಿವ ಮನವ ಸಂತೈಸು
ತಂಪಿರಲಿ ಸಮಯ
ಬಾಡದಿರು ಮೊಗ್ಗೆ ನೀನು
ನಲಿವು ಕುಣಿದು ಬರಲಿ
ಕೋರೈಸುವ ಕೋಲ್ಮಿಂಚು
ನಿನ್ನ ಅರಸಿ ಬರಲಿ
ಭಾವ ಕೋಶ ಮುದುಡುವಂತ
ಸ್ವಪ್ನ ಬೀಳದಿರಲಿ