(ಅಖಿಲೇಶ್ ಈಶ ಅವರು ಸಂಗ್ರಹಿಸಿದ ಹುಸೇನ್ ಚಿತ್ರಗಳನ್ನು ನೋಡಿ ಮನದಾಳದಿ ಮೂಡಿದ ಭಾವನೆಗಳು ಇಲ್ಲಿವೆ )

ನಾ ದಿವಾಕರ

ಮೋಡಿಯೋ ಮಾಯವೋ

ಕಲಾಸಿರಿಯ ಚೆಲುವೋ !

ಅದೋ ನೋಡಿ ಸುಕ್ಕುಗಟ್ಟಿದ

ಕೈಯ್ಯೊಂದರಲ್ಲಿನ ಕುಂಚ ಏನನ್ನೋ ಹೇಳ

ಬಯಸುತ್ತಿದೆ : ಹುಡುಕಾಡುತಿದೆ

ಇಂಗಿತಗಳನು ಮನುಕುಲದ

ಅಂತರಾಳದೊಳಗಿನಿಂದ ;

ಎಷ್ಟೊಂದು ಬಣ್ಣಗಳು ಸುತ್ತ

ಕಪ್ಪು ಬಿಳುಪಿನ ರೇಖೆಗಳ ಮರೆಸಲು !

ಕುಂಚದೊಳಗಿನ ಭಾವನೆಗಳು

ಬಣ್ಣದ ಚಿತ್ತಾರಗಳಲಿ ಚಿಮ್ಮಿ

ಮಾತನಾಡತೊಡಗುವಾಗ ಕಲಾ

ತಪಸ್ವಿಯ ಮನ ಹೊಯ್ದಾಡುತ್ತದೆ ;

ಅಸ್ಮಿತೆಗಳ ನಡುವೆ ಯಾಂತ್ರಿಕತೆಯ

ಕ್ಲೀಷೆಗಳ ನಡುವೆ ; ಪ್ರವಾದಿಯೋ

ಸಂತನೋ ಅಗೋಚರ ಶಕ್ತಿಯೋ

ಕುಂಚಗಳಿಗೆ ಕಚಗುಳಿಯಿಡುವ

ಸ್ನಿಗ್ಧ ಕೈಗಳಿಗೇನುಂಟು ನಂಟು ?

 

ಕುಳಿತಲ್ಲೇ ಜಗವ ಕಾಣುವ

ವಾಂಛೆ ಮನದಾಳದಿ ಮೂಡಿದಾಗ

ಚಿತ್ರಗಳು ಮಾತನಾಡುತ್ತವೆ ಸುತ್ತಲಿನ

ಗೋಡೆಗಳೊಡನೆ ; ಬೇಕಲ್ಲವೇ ಸಂಗಾತಿ

ನಿರ್ಭಾವ ಜೀವಿಗಳಿಗೂ ?

ಬಣ್ಣಗಳ ಮೆರವಣಿಗೆಯಲಿ

ಎಲ್ಲಿದೆ ನಿರ್ಭಾವುಕತೆ ಎಲ್ಲವೂ

ಭಾವುಕವೇ ಭಾವನೆಗಳನರಿತವರಿಗೆ !

 

ಭ್ರಮೆಯೋ ಭಾವನೆಯ ಉಪಮೆಯೋ

ಪ್ರತಿಮೆಗಳು ಕಣ್ತೆರೆದಾಗ

ಕಾಣುವುದು ವಾಸ್ತವತೆಯ ಸತ್ಯ ;

ಮೆರೆಯುತಿಹನೇ ಈ ಸಂತ

ತನ್ನೊಡಲಿನೊಳಗಣ ಮಾನವತೆಯನು

ಕಲ್ಪನಾಲೋಕದ ಕಿನ್ನರಿಗಳು

ಬಣ್ಣಗಳಲಿ ಮೇಳೈಸುತಿರುವಾಗ !

 

ಎಲ್ಲೋ ಸಾಗಿತು ದಿವ್ಯ ಚೇತನದ

ಯಾತ್ರೆ ; ಖಯಾಲಿಗಳ ಲೋಕದಲಿ

ಮೆರೆದು ಹೋದವನ ಹೆಜ್ಜೆ ಗುರುತುಗಳು

ಖಾಲಿ ಖಾಲಿ : ಈ ವಿಶ್ವ ನಿಮ್ಮದಲ್ಲ

ಬಿಡಿ ಸಾಹೇಬರೇ

ನಡೆದಿರುವಿರಿ ಕಲಾಸನ್ನಿಧಿಯೆಡೆಗೆ

ಇರುವುದೆಲ್ಲವ ಮರೆತು ;

ಮರೆವುದೆಲ್ಲವ ತೊರೆದು !

 

]]>