ಅವಳು ಮತ್ತು ಆ ಮರ

– ಎಚ್ ಕೆ ಶರತ್

ಅವಳು
ಆ ಮರದೊಂದಿಗೆ
ಮಾತಿಗಿಳಿದಿದ್ದಾಳೆ
 
ತನ್ನಂತೆ
ಚೆಲುವು ಕಳಕೊಂಡು
ಬರಡಾಗಿರುವ
ಅದರೆದುರು
ಚೂರಾದ ಕನಸುಗಳ ಲೆಕ್ಕ
ಒಪ್ಪಿಸುತ್ತಿದ್ದಾಳೆ
 
ಮರ ಹರಡಿಕೊಂಡಿದೆ
ವಿಶಾಲವಾಗಿ
ಹಸಿರು ಕಳಕೊಂಡು
ನೆರಳಿನ ನೆಂಟಸ್ತನ ತೊರೆದಿದೆ

ಆದರೂ ಅವಳು
ಅದರ ಬುಡದಲ್ಲೇ ಕುಳಿತು
ಬಿಸಿಲಿನ ಧಗೆ ಎದುರು
ತನ್ನೊಡಲ ದುಃಖ ತೋಡಿಕೊಳ್ಳುತ್ತಿದ್ದಾಳೆ
 
ಬಿಸಿಲು ಮರೆಯಾಗಿದೆ
ತಂಪು
ಮರದೊಡಲಿನ ಹೊರಗೂ ಹಾಜರಾಗಿದೆ
 
ಅವಳಿನ್ನೂ
ಮರದ ಬುಡದಲ್ಲೇ ಕುಳಿತಿದ್ದಾಳೆ
ಮಾತು ಸರಿಸಿ
ಮೌನ ವರಿಸಿ
ನಿಟ್ಟುಸಿರು ಅರಸುತ್ತಿದ್ದಾಳೆ