ಮಲಯಾಳಂ ಮೂಲ : ಸಾವಿತ್ರಿ ರಾಜೀವನ್

ಕನ್ನಡಕ್ಕೆ: ತೇರಳಿ ಎನ್ ಶೇಖರ್

ಅಮ್ಮನನ್ನು ಮೀಯಿಸುವಾಗ
ಹಸುಗೂಸನ್ನು ಮೀಯಿಸುತ್ತಿರುವಂತೆ
ನಿಗಾ ವಹಿಸಬೇಕು.
ಒಡಲು ಕೈಯಿಂದ ಜಾರಬಾರದು
ನೀರು ಉಗುರುಬೆಚ್ಚಗಿರಬೇಕು,
ಕಾಲ ಸಪೂರಗೊಳಿಸಿದ
ಆ ಒಡಲನ್ನು
ಕಟುವಾಸನೆಗಳ ಪಸರಿಸುವ
ಸೋಪುದ್ರಾವಕದಿಂದ ನೊರೆಗಟ್ಟಬಾರದು,
ಕಣ್ಣುಗಳು ಉರಿಯಬಾರದು.

ಒಂದೊಮ್ಮೆ
ನಿನ್ನನು ಮೀಯಿಸಿ ಸಿಂಗರಿಸಿದ
ಅಮ್ಮನ ಕೈಗಳಲ್ಲಿ
ಅಂದು ನೀನು ಗಿಲಿಕಿಯಾಡಿದ ಬಳೆಗಳು
ಅವುಗಳ ಕಿಲಕಿಲ ನಗೆಗಳು ಕಾಣುವುದಿಲ್ಲ,
ನಿನ್ನ ಎಳೆ ಹಲ್ಲ ಕಡಿತಕ್ಕೊಳಗಾದ ಹಳೆಯ ಉಂಗುರ
ಆ ಬೆರಳಿನಿಂದ ಎಂದೋ ಬಿದ್ದು ಹೋಗಿರುತ್ತದೆ.

ಆದರೀಗ
ಅಮ್ಮನ ಕೈಗಳಲ್ಲಿವೆ
ಸುಕ್ಕುಗಳ
ಅಸಂಖ್ಯಾತ ನೆರಿಗೆಯ ಬಳೆಗಳು
ನೆನಪುಗಳಿಂದ ಥಳಥಳಿಸುತ್ತಿರುವಂಥವು.
ಏಳೋ ಎಪ್ಪತ್ತೋ ಏಳುಸಾವಿರವೋ
ಅದರಲ್ಲಿ ವರ್ಣಪಲ್ಲಟಗಳು?
ಎಣಿಸಲು ಹೆಣಗಾಟಬೇಡ
ಕಣ್ಣುಮುಚ್ಚಿ
ಉಗುರುಬೆಚ್ಚಗಿನ ನೀರುಬಿದ್ದು
ಮೆತ್ತಗಾದ ಆ ಮೃದು ಮೈಯನ್ನು
ಸ್ಪರ್ಶಿಸಿ ನೇವರಿಸುತ್ತಾ ಇದ್ದುಬಿಡು.

ಆಗ
ನೆನಪುಗಳು ದಟ್ಟೈಸಿ ತಿಣುಕಾಡಿದ
ಆ ಸುಕ್ಕುಗಳು ಸೆಟೆದುಕೊಳ್ಳುತ್ತವೆ.
ಅಮ್ಮ ಮೆಲ್ಲಗೆ ಕೈಗಳನು ಚಾಚಿ
ಪುನಃ ನಿನ್ನನು ಮೀಯಿಸತೊಡಗುತ್ತಾಳೆ
ಎಣ್ಣೆ ಸೀಗೆಕಾಯಿಗಳಲ್ಲಿ ಮುಳುಗುತ್ತಾ
ನೀನು ಮಿಂದು ಸ್ಫುಟವಾಗಿ
ಬೆಳಗುತ್ತಿರುತ್ತೀಯಾ.

ಆಗ
ಅಮ್ಮ ನಿನಗಿತ್ತ ಮುತ್ತಗಳಲ್ಲೊಂದನ್ನು
ನೀನು ಪ್ರತಿಯಾಗಿ ಅಮ್ಮನಿಗೆ ಕೊಟ್ಟುಬಿಡು.
ಅಮ್ಮನನ್ನು ಮೀಯಿಸುವಾಗ
ಹಸುಗೂಸನ್ನು ಮೀಯಿಸುತ್ತಿರುವಂತೆ….