ಅಪ್ಪ

ನಾ ದಿವಾಕರ್

ಮೂರು ದಶಕಗಳಾದವೇ

ಇಹವ ತೊರೆದು

ಮರೆತಿಲ್ಲ ಬಿಡು

ನೆನಪಿನಂಗಳದಲಿ

ಹಸಿರಾಗಿಯೇ ಇದೆ

ಆ ಗಂಭೀರ ನಗೆ

ರಾಜಠೀವಿಯ ನಡಿಗೆ !

.

ಹಿಂದಿರುಗಿ ನೋಡಲೇ

ಇಲ್ಲ ಬದುಕಿದ್ದಾಗಲೂ ;

ಛಲದಂಕನಲ್ಲವೇ !

ಭವಿಷ್ಯದಲಿ ನೆಟ್ಟ ನಿಸ್ಪೃಹ

ದೃಷ್ಟಿ ಕೈಗೂಡಲಿಲ್ಲ

ಧೃತಿಗೆಡಲೂ ಇಲ್ಲ !

.

ಕರಗಿ ನೀರಾದರೂ ಹರಿಯದ

ಕರುಣರಸ ಹೃದಯ

ಕತ್ತಿಯಲುಗಿನ ನಡೆಯೂ

ಮಂದಹಾಸದೊಡನೆಯೇ ?

ಬಂಡೆಗಳಲ್ಲವೇ ಕರುಳಬಳ್ಳಿಗಳು

ಕೈಪಿಡಿಯದಿರೇನು

ನಡೆದೆಯಲ್ಲವೇ ಕೈ ಬೀಸಿ !

.

ಬದುಕಿನ ಹೆಜ್ಜೆಗಳು

ಓಯಸಿಸ್ನಂತೆ

ಕೈಗೆಟುಕಲಿಲ್ಲ

ಮನ ತಣಿಸಲಿಲ್ಲ

ಬೆನ್ನ ಹಿಂದಿನ

ಚಿಲುಮೆ ಕಂಗಳಿಗೆ ದೂರ ;

ಬೆನ್ನೆಲುಬಿಗೆ ಭಾರ

ಸಂಬಂಧಗಳ ಚಿತ್ತಾರ !

.

ಎತ್ತ ಸಾಗಿದರೇನು

ಸುತ್ತ ಕಂದಕಗಳ ಸಂತೆ

ಸಪ್ತಪದಿಯ ನೆನಪುಗಳು

ಅಗ್ನಿಯಂತೆ !

ಗಂಡಗಳನೆದುರಿಸಲು

ಭಂಡೆದೆಯೂ ಬೇಕು

ನಿನ್ನದೇ ಹೆಜ್ಜೆ

ಪಿಂಡದಾನವದೇಕೆ !

.

ಚಿತಾಸ್ಪರ್ಶವೆ ನಿನ್ನಡಿಗೆ

ಸಲ್ಲಿಸಿದ ಸೇವೆ

ಚಿಂತೆಯಿಲ್ಲ ಬಿಡು !

ಮರೆವು ಮನುಜನ ವರ

ಹೇಗೆ ಮರೆವುದು

ನೀ ಅಜರಾಮರ !

ಜೀವತುಂಬಿದ ನೋಟ

ತುಂಬಿದೆ ತನುಮನಗಳ

ಇಂದಿಗೂ

ಎಂದೆಂದಿಗೂ !

(35 ವರ್ಷಗಳ ಹಿಂದೆ 17/12/1977ರಂದು ಅಗಲಿದ ತಂದೆಯ ನೆನಪಿನಲ್ಲಿ)