ಜೀವನ್ ಪ್ರಕಾಶನ, ಕೋಲಾರ ಹಮ್ಮಿಕೊಂಡಿದ್ದ ದಸರಾ ಕವಿತೆ ಸ್ಪರ್ಧೆಯಲ್ಲಿ

ಮೆಚ್ಚುಗೆ ಪಡೆದ ಕವಿತೆ 

ರೇಣುಕಾ ಹೆಳವರ್

ಒಂದು ಸಣ್ಣ ಸ್ಪರ್ಶಕ್ಕೂ.

ವರ್ಷಗಟ್ಟಲೇ ಕಾದೆ

ಒಮ್ಮೆಯೂ ಮುಟ್ಟಲಿಲ್ಲ

ನಿನ್ನದೇ ಪಿಂಡದ ತುಣುಕು ನಾ

ಎಲ್ಲದಕ್ಕೂ ಬೇಸರಿಸಿ

ಸದಾ ಬೈಗುಳಗಳ ಸಾಲು ಹರಿಸಿ

ಅದೇಕೋ ನನ್ನ ಕಂಡರೆ ನಿನಗೆ ವಾಕರಿಕೆ

ಅದೆಷ್ಟೋ ಕನಸುಗಳ

ಕಣ್ಣಂಚಿನ ಸೌಧದಲ್ಲಿ ಕಟ್ಟಿದೆ

ಸಾವಿರ ಸಾವಿರ ನದಿ ಹರಿದರೂ

ಜಗ್ಗಲಾರದೂ,ಮುಟ್ಟಲಾರದೂ

ನೀ ನನ್ನ ಮುಟ್ಟದ್ದಕ್ಕೆ

ಪ್ರೀತಿ ನೀಡದ್ದಕ್ಕೆ

ಒಡಲ ಉಡಿಯಲ್ಲಿ ಮಲಗದ್ದಕ್ಕೆ ಬೇಜಾರಿದೆ

ಹಾಗಂತ

ನಿನ್ನ ಮೇಲಿನ ಪ್ರೀತಿ ಕಮ್ಮಿಯಾಗಿಲ್ಲ

ಯಾಕೆಂದರೆ !

ನೀ ನನ್ನವ್ವ

ಅದೆಷ್ಟೋ ಪಾಠ ಕಲಿಸಿದೆ

ಪ್ರೀತಿ ನೀಡದೆ

ಪ್ರೀತಿ ಹಂಚಲು ಕಲಿಸಿದೆ

ಕನಸು ಕಿತ್ತು

ಕನಸು ಕಾಣಲು ಕಲಿಸಿದೆ

ದುಃಖ ಹೊದ್ದು ನಗುತ ಬಾಳಲು ಕಲಿಸಿದೆ

ಸಾಕಲ್ಲವೇ ಈ ಜನ್ಮಕ್ಕಿಷ್ಟು.