ಸತ್ಯಮಂಗಲ ಮಹಾದೇವ

ಸಖೀ
ಅಪರೂಪ ಅಪರೂಪ ನಿನ್ನಾ
ನಗೆಯೇ ಅಪರೂಪ
ಹಾಲು ಕೆನೆಗಟ್ಟುವುದು ಹದವಾಗಿಕಾದು
ನವನೀತಕೆ ದಾಟುವಾ ಸೋಜಿಗದಂತೆ
ಅಪರೂಪ

ಸಖೀ
ಮಳೆಯು ಹೆಣ್ಣಾಗಲು ಹರೆಯ
ಮರಳುವುದು ಭುವಿಗೆ
ಹಸಿರು ಕಾಣಿಸುವ ಆನಂದದ ಎತ್ತರ
ಅಪರೂಪ
ಆ ಹಸಿರು ಸೀರೆಯಲಿ ನಳನಳಿಸುವ ನಿನ್ನ
ಜಗವು ಜವ್ವನೆಯ ಜಪವನೆ ಮರೆವುದು
ಅಪರೂಪ

ಸಖೀ
ಭಾವ ಪಲ್ಲವಿಸೆ ಮನಸು ನವಿಲಾಗುವುದು
ಕನಸೊಡೆಯುವ ಬಣ್ಣದ ಕನಸಿಗೆ
ಮೈ ಮರೆಸುವ ನೀಲಿಯ ಅಪ್ಪುಗೆ
ಅಪರೂಪ
ನೀಲಿಗೆ ನಿಲುಕದ ನಿನ್ನ ನಯನದ
ಕನಸುಗಳೇ ಅಪರೂಪ

ಸಖೀ
ಸ್ಪರ್ಷಕೆ ಕಾಯುವ ಕಣ್ಣಿನ ನೋಟವು
ಅಪರೂಪ
ಜಿಂಕೆಯ ಹೊಂಬಣ್ಣದ ಜಿಗಿತವೆ
ಅಪರೂಪ
ನಿನ್ನ ಕಣ್ಣಲಿ ನೋಟಕೆ
ಸೋತ ಕವಿಯ ಸಾಲು ಅಪರೂಪ