ಅವನು ಅನ್ನದ ತುತ್ತು ಬಾಯಿಗಿಡುವಾಗ
ಅವರು ಕೈ ಚಾಚುತ್ತಾರೆ
ತಮ್ಮ ರಕ್ತಸಿಕ್ತ ಬಾಯಿಗಳ ತೆರೆದುಕೊಂಡು

ಕುಡಿವ ಮದ್ಯವ ತಾವೇ ಹೊತ್ತು ತರುತ್ತಾರೆ
ಬಟ್ಟಲಲಿ ಬೆರಳಾಡಿಸುತಾ ಸುರಿಯುತ್ತಾರೆ
ಬಟ್ಟಲು ಒಡೆದ ಬಳಿಕ
ತಮಗೆ ತಾವೇ ಇರಿದುಕೊಂಡು
ಸುತ್ತ ಕುಣಿಯುತ್ತಾರೆ
ಗೆಳೆಯನೊಬ್ಬನ ಮದುವೆ ಮೆರವಣಿಗೆಯಂತೆ

ಏಕಾಂತದ ಕತ್ತಲಲ್ಲಿ ಕತ್ತಲಾಗುತ್ತಾರೆ
ತಡವಿದಲ್ಲೆಲ್ಲ
ತುಂಡಾದ ಮುಖ ಮೂಗು ಕಣ್ಣುಗಳಾಗಿ
ಮಾತು ಬೆಳೆಸುತ್ತಾರೆ

ರಾತ್ರಿಯ ಹಾಸಿಗೆಗಳಲಿ
ಸಂಗಾತಿಗಳಾಗುತ್ತಾರೆ
ಮೈಗೆ ಮೈ ತೀಡುತ್ತಾ
ಮನಸ್ಸಿನಾಳದಲ್ಲೆಲ್ಲೋ ಹುದುಗಿದ ನಗ್ನ ದೇಹಗಳ
ಇಲ್ಲವಾಗಿಸುತ್ತಾರೆ
ಉಳಿದ ಎಲುಬಿಗೆ ಬೆಂಕಿ ಇಕ್ಕುತ್ತಾರೆ.