ಯಮುನಾ ಗಾಂವ್ಕರ್

ಬೆಂಕಿ ಬಿದ್ದಿದೆ
ಬೆವರು ಸಾಕಾಗದು ನಂದಿಸಲು …

ಉರಿ ಹೊತ್ತುತ್ತಲೇ ಇದೆ
ಬತ್ತಿಹೋದ ನದಿಯಲ್ಲೂ
ಒತ್ತರಿಸಿ ಬಿದ್ದಿರುವ ತರಗೆಲೆಗಳಿಗೆಲ್ಲ…

ಸುಳಿಸುಳಿಯುತ್ತ ಎತ್ತಿ ಎಸೆಯುತ್ತಿದೆ
ಎತ್ತೆತ್ತಲೋ ತೂರುತ್ತಿದೆ
ತಡೆವವರಾರು ಕಾಡ್ಗಿಚ್ಚಿನ ಜ್ವಾಲೆ?

ಬೆಂದವರ ಅರೆಬೆಂದವರ
ದಿಕ್ಕೆಟ್ಟವರ ಕೊಸರು ಕೇಳುತ್ತಿಲ್ಲ
-ಗಾಳಿ ಘರ್ಜನೆಯಲ್ಲಿ-
ನರಳಲು ಉಸಿರೇ ಸಾಲುತ್ತಿಲ್ಲ!

ಭೂಮ್ಯಾಕಾಶದ ತುಂಬಾ
ಹೊಗೆಯಾಡುತ್ತಿದೆ
ಇತ್ತ ಬೆಂಕಿಯುಗುಳುತ್ತ
ಹಗೆಯ ಕೊಂಡೊಯ್ದ ಬೀಸುಗಾಳಿ
ಮರಳಿ ಅಪ್ಪಳಿಸಿದೆ
ಬಿರುಗಾಳಿಯಾಗಿ…