ಹೃದಯಶಿವ

ಕಣ್ಣೆದುರು ನೀನಿರಲು ನನ್ನೊಳಗೆ ಕವಿತೆಗಳು
ಇನ್ನೆಂದು ನೀ ದೂರವಾಗಬೇಡ
ನಂಟು ಎಂಬುದು ಇದುವೇ ತುಸು ಹತ್ತಿರಕೆ ಬಾರೆ
ಹಾಡಬೇಕಿದೆ ಕೂಡಿ ಒಂದು ಹಾಡ

ಯಾವ ಸುಮುಹೂರ್ತದಲಿ ನೀ ಸೆಳೆದೆ ನನ್ನನ್ನು
ಯಾರು ನೀ ನನಗೀಗ ಹೇಳು ಗೆಳತಿ
ಹೀಗೆ ಸಾಗಲಿ ಪಯಣ ಬೆಸೆದಿರಲಿ ಜೋಡಿ ಕೈ
ಬೆಳಗುತ್ತಲಿರಲೆರಡು ಕಣ್ಣ ಪ್ರಣತಿ

ನಿನ್ನ ಮಡಿಲಲಿ ನಿಮಿಷ ತಲೆಯಿಟ್ಟು ಮಲಗುವೆನು
ಹಾಡೆನಗೆ ಇನಿದಾದ ಜೋಗುಳವನು
ಕಣ್ಣ ತುಂಬುವ ಕನಸಿನಲ್ಲು ನೀ ಸುಳಿವಾಗ
ಕಳೆದುಹೋಗುವೆ ನಾನು ಹುಡುಕು ನೀನು

ನೋಡಿಲ್ಲಿ ಈ ದೋಣಿ ನಮಗಾಗಿ ಕಾಯುತಿದೆ
ಏರಿ ಸುತ್ತುವ ಬಾರೆ ನೀಲಿ ಕಡಲ
ದೂರದ ದಿಗಂತದಲಿ ಸೂರ್ಯ ಮುಳುಗುತ್ತಿಹನು
ಕನಸಿ ನಮ್ಮೊಳಗೊಂದು ಹೊಸತು ಹಗಲ

ನೋಡೀಗ ತಾರೆಗಳು ಮೂಡಿಹವು ಬಾನಿನಲಿ
ಬಾ ಇಲ್ಲೇ ಕಳೆಯೋಣ ಬೆಳ್ಳಿ ಇರುಳು
ಬಾಕಿಯೇನಿದೆ ಇನ್ನು ಸಾಂಗತ್ಯದಲೇ ಸುಖವು
ಬಾಹುಬಂಧನದಲ್ಲಿ ಮೆಲ್ಲನರಳು