ಹಣತೆ ಹನಿಗಳು

ಕಣ್ಣಲ್ಲಿ ಹಚ್ಚಿಟ್ಟ ಹಣತೆಯ ದೀಪಕ್ಕೆ ಮಿನುಗಿಚಟಪಟಿಸಿದ್ದು

ನಿನ್ನ ಬಿಳಿಹಲ್ಲುಗಳ ನಕ್ಷತ್ರಕಡ್ಡಿ

ಯ ನಡುವಿಂದ

ಹೊರಟ ಬೆಳಕಿನ ಸದ್ದು

**
ಇರಲಿ ಬಿಡು ಸುತ್ತೆಲ್ಲ ಕತ್ತಲೆ

ಇಲ್ಲದಿರೆ ನನ್ನ ಹಣತೆಗೆಲ್ಲಿ ಬೆಲೆ!

ನಿನ್ನ ಮೊಗದ ಮೇಲಿನ ನನ್ನ ಕಣ್ರೆಪ್ಪೆಯ ನೆಳಲಿಗೆ

ಕಂಡಷ್ಟು ಬೆಳಕು ಸಾಕು

ಬೆಳಗಾದಮೇಲೂ

ಹಣತೆಯಲ್ಲೆಲ್ಲ ಈಗೀಗ ಎಣ್ಣೆ ಸುರಿಯುವುದಿಲ್ಲವಂತೆ

ನೆತ್ತರ ಬಸಿದೆರೆದು ಬೆನ್ನಹುರಿ ಹೊಸೆದು ಹೊತ್ತಿಸಿದ

ಬತ್ತಿಯಾ ಉರಿ ಬಹು ಪ್ರಖರವಂತೆ

**

ಹಬ್ಬವಾಗುವುದೇನೆ ಹುಡುಗಿ

ಅಬ್ಬರದ ಸದ್ದಲ್ಲಿ ಬೊಬ್ಬಿರಿವ ಊರಲ್ಲಿ

ಬೊಟ್ಟು ಚೀಪುವ ನಿನ್ನ ಬಾಯಲ್ಲಿ ಬತ್ತಾಸು ಬರುವುದೇನೆ?