ಬಳ್ಳಿಯಂಥವಳು
ಗೀರ್ವಾಣಿ
ಮೊದಲೇ ಹೇಳಿ ಬಿಡುತ್ತೇನೆ
ನಾನು ಬಳ್ಳಿಯಂಥವಳು
ನಿನ್ನದೇ ತೇವದಿಂದ ಮೊಳಕೆಯೊಡೆದು
ಬೇರೂರುವವಳು.
ನಿನ್ನದೇ ಬುಡದಲ್ಲಿ ಗೊಬ್ಬರ ಕದಿಯುವವಳು
ನಿನ್ನದೇ ಅಗಾಧ ರೂಪಕ್ಕೆ ತಬ್ಬುವವಳು
ನಿನ್ನದೇ ಅಂಗಾಂಗಗಳ ರಸ ಹೀರಿ
ಮೇಲೇರುವವಳು
ನಿನ್ನದೇ ಎದೆ ತೊಡೆಗಳಲ್ಲಿ
ಪಸರಿಸುವವಳು
ನಿನ್ನದೇ ತೋಳಲ್ಲಿ ಹೂ ಬಿಡುವವಳು
ತಂಗಾಳಿಗೆ ನೀ ಬಾಗಿದಾಗ
ಅವುಚಿ ಕೂರುವವಳು
ಇನ್ಯಾರದೋ ಪರಿಮಳಕ್ಕೆ ಪಾಲು ಕೇಳುವವಳು
ನಿನ್ನದೇ ತಲೆಯೇರಿ ನಿನಗೇ ಭ್ರಮೆ ಹುಟ್ಟಿಸುವವಳು
ನಿನಗಿಂತ ಚಂದದ ಹೂ ಬಿಟ್ಟು ಮರುಳು ಮಾಡುವವಳು
ನಿನ್ನದೇ ಪ್ರೀತಿಗೆ ಹಬ್ಬಿದವಳು
ನಿನ್ನದೇ ತಿರಸ್ಕಾರಕ್ಕೆ ಒಣಗಿದವಳು
ನೀ ಧರಾಶಾಹಿಯಾದಾಗ
ನಿನ್ನದೇ ಕೊಂಬೆಗಳನ್ನು ಬಳಸಿ
ಇನ್ನೊಂದು ಮರಕ್ಕೆ ಹಬ್ಬುವವಳು
ಏಕೆಂದರೆ ನಾ ಬಳ್ಳಿಯಂಥವಳು.
ಗೊಬ್ಬರ ಕದಿಯುವವಳು, ಇನ್ಯಾರದೋ ಪರಿಮಳಕ್ಕೆ ಪಾಲು ಕೇಳುವವಳು, ನಿನಗಿಂತ ಚಂದ ಹೂಬಿಟ್ಟು ಮರಳು ಮಾಡುವವಳು.. Nice lines..
ಕವಿತೆ ಸೊಗಸು. ತಾಯಿಯ ತೊಡೆಯ ಮೇಲೆ ಬೆಳೆದ ಮಗಳ ತೊದಲು ನುಡಿಯಂತಿದೆ
Ninnadee thiraskarakke onagidavalu…superrr
Kavite tumba sogasaagide
Excellent
Thanks to all.
Geervani