ನಮ್ಮಮ್ಮನ ಸಣ್ಣ ಸಣ್ಣ ಅನುಭವಗಳು

ಮೋಹನ್ ವಿ ಕೊಳ್ಳೇಗಾಲ

ನಮ್ಮಮ್ಮನ ಮೂರು ಬೆರಳಿಗೆ ಗೊತ್ತು

ಉಪ್ಪಿನಳತೆ

ಕಾಂಪಾಸ್ಸಿಲ್ಲದೆ ದೋಸೆ ಉಯ್ಯುವ

ಅವಳದಗಣಿತ ಬುದ್ಧಿ

ಚಂದ್ರನನ್ನು ಮೊದಲು

ತಟ್ಟೆಯಲ್ಲಿ ಹಿಡಿದಿಟ್ಟು ಕೊಟ್ಟವಳು

.

ಬೇಲಿ ಮೇಲಿನ ಸೊಪ್ಪು ಜಜ್ಜಿ ಜಜ್ಜಿ

ಉಗುರು ಬಣ್ಣ ಹಚ್ಚಿದವಳು

ಉಗುರ ಗಾಯ ಒಣಗಿಸಿ

ನೋವ ನುಂಗಿದವಳು

ಸಾಂಬ್ರಾಣಿ ಹೊಗೆಯಲ್ಲಿ

ನೋವ ತೆಗೆದವಳು

ಕೆರೆ ಏರಿಯ ಮಣ್ಣನ್ನು ಕೂದಲಿಗಜ್ಜಿ

ಹೊಳೆಯುವಂತೆ ತೊಳೆದವಳು

.

ಮುಂಜಾನೆಗೇ ಹೊಲದಂಗಳದ

ಮುಳ್ಳಿನ ನಡುವೆ

ವಿಷದ ಸೊಪ್ಪು ಆಯ್ದು

ಉಪ್ಹೆಸರ ಸೊಪ್ಪು ಕೊಯ್ದು

ಬರಿ ಕೆಂಡದಲ್ಲಿ ಸೌದೆ ಹೊತ್ತಿಸಿ

ತನ್ನ ಹಸಿವೆಗೆ ಕಾಯದೆ ನನ್ನ ಹಸಿವಿನಷ್ಟರಲ್ಲಿ

ಹೊಟ್ಟೆ ತುಂಬಾ ಬಡಿಸಿದವಳು

.

ಹತ್ತು ಹೆರಿಗೆ ಮಾಡಿಸಿದ್ದಾಳಂತೆ

ತಾನೂ ಐದು ಹೆತ್ತು

ಒಂದು ಮಗು ಅಳುವಾಗ ಮುದ್ದಿಸಿ

ಇನ್ನೊಂದನ್ನೂ ಸಂತೈಸಿ

ಜೊತೆ ಜೊತೆಗೆ ಒಲೆಗೆ ಬೆಂಕಿಯಟ್ಟಿದವಳು

ಕುಡುಕ ಗಂಡನನ್ನು ತಬ್ಬಿದವಳು

.

ಅವಳ ಸಣ್ಣ ಸಣ್ಣನುಭವಾಶ್ಚರ್ಯಗಳು

ಕಣ್ಣರಳುವಂತೆ ಮಾಡುತ್ತವೆ

ಮನೆಯಿಂದ ಹೊರೆಗೆ

ಕಾಲಿಟ್ಟೊಡನೆ

ರಂಗೋಲಿ ತಾಗಿಸುತ್ತಾಳೆ

ಅಲಾರಂ ಇಲ್ಲದೇ ಬೇಗ ಎದ್ದು!