ಎಲ್ಲಾ ದಿನಗಳೂ ಹಾಗೇ ಇವೆ!

ಶ್ರೀವಿಭಾವನ

1
ಕ್ಯಾಲೆಂಡರ್‍ನಲ್ಲಿ ಹಾಕಿದ್ದ ಪೆನ್ಸಿಲ್ ಗುರುತು
ನೆನಪಿಸಿತು. ನಿನ್ನೆ ವಸಂತ ಋತುವಿನ ಮೊದಲ ದಿನ
ಹುಡುಕುತ್ತಿದ್ದೇನೆ ನನ್ನೊಳಗೆ
ಮೊನ್ನೆಯಿಂದ ನಿನ್ನೆಗೆ, ನಿನ್ನೆಯಿಂದ
ಇಂದಿಗೆ ಏನಾಗಿದೆ ಎಂದು
ಹಾಗೇ ಇದ್ದೇನೆ; ಎಲ್ಲವೂ ಹಾಗೇ ಇವೆ
2

ಮನೆಯ ಎದುರಿನ ಮಾವಿನ ಮರ
ಹೂ ಬಿಟ್ಟಿಲ್ಲ; ಚಿಗುರಿದ ಎಲೆಗಳೆಲ್ಲವೂ
ಧೂಳಿನಲ್ಲಿ ಮುಚ್ಚಿವೆ.
ಕೋಗಿಲೆಗಳು ಹಾಡುತ್ತಿಲ್ಲ
ಏನೋ ಕೆಟ್ಟ ಮರೆವು ಅವುಗಳಿಗೆ.
ಋತುಗಳ ನೆನಪು ಮಾಸಿದೆಯಂತೆ.
3

ಹೊಲ ಗದ್ದೆ, ಕೊಟ್ಟಿಗೆ, ಕೊನೆಗೆ
ದಟ್ಟ ಕಾಡಿನ ಮಧ್ಯೆ
ವಸಂತ ರಾಜನ ಆಗಮನದ ಸುಳಿವಿಲ್ಲ
ಏನೋ ಒಂದು ಸಂಕಟದ ಮೌನ!
ನೀರಿಲ್ಲದೆ ಒಣಗಿದ ಮಣ್ಣಲ್ಲಿ
ಬರೀ ಸೂತಕಗಳ ಮೆರವಣಿಗೆ.

4

ಹಳೆ ಪುಸ್ತಕಗಳ ಧೂಳು ಕೊಡವಿಟ್ಟಿದ್ದೇನೆ
ಅನುಭವಿಸಲಾಗದ ಸಂಗತಿಗಳನ್ನು
ಊಹಿಸೋಣವೆಂದು, ನನ್ನೊಳಗೇ ಒಬ್ಬ
ವಸಂತನನ್ನು ಎದುರುನೋಡುತ್ತಾ.
ಛಂದದ ಒಂದು ದಿನಕ್ಕಾಗಿ
ಆದರೆ ಮುಳುಗೇಳುವ ಸೂರ್ಯ ಬದಲಾಗುತ್ತಿಲ್ಲ.