–ಡಾ. ಗೋವಿಂದ ಹೆಗಡೆ

ಇಲ್ಲಿ ಇಂಥದ್ದೆಲ್ಲ ನಡೆಯಬಾರದಿತ್ತು

ಕಡ್ಡಿಯನ್ನು ಗುಡ್ಡ ಮಾಡಬಾರದಿತ್ತು

ಸಹಜ ಸಂವಾದಕ್ಕೆ ಎಡೆಯೇ ಇಲ್ಲವೇ

ಕಾನೂನಿನ ಗುಮ್ಮ ತೋರಿಸಬಾರದಿತ್ತು

ವಾದ ದುರ್ಬಲವಿದ್ದಾಗಲೇ ದನಿ ಜೋರು

ಪ್ರಶ್ನಿಸುವ ಬಾಯಿಗಳ ಮುಚ್ಚಿಸಬಾರದಿತ್ತು

“ಖಾಲಿ”ಕೊಡಗಳಿಗೂ ಉತ್ತರಿಸಬೇಕಾಗುತ್ತದೆ

ನಿರುತ್ತರದ ಈ ದುರವಸ್ಥೆ ಬರಬಾರದಿತ್ತು

ವ್ಯಕ್ತಿತ್ವಕ್ಕೊಂದು ಘನತೆ ಇದೆ ‘ಜಂಗಮ’

ಅದನ್ನು ಮರೆತಂತೆ ವರ್ತಿಸಬಾರದಿತ್ತು

ಗಜ಼ಲ್- 2

ನಿಜ, ಹದ್ದಾಗಿ ಕುಕ್ಕಬಹುದು ಪಾರಿವಾಳ

ಗಿಡುಗನಾಗಿ ಎರಗಬಹುದು ಪಾರಿವಾಳ

ಏನೆಲ್ಲ ರೂಪಾಂತರಕ್ಕೆ ಎಡೆಯಿದೆ ಇಲ್ಲಿ

ಡೇಗೆಯಾಗಿ ಸೊಕ್ಕಬಹುದು ಪಾರಿವಾಳ

ಇಂದಿನ ಈ ಮೃದುತ್ವ ಕಳೆದೇಹೋದೀತು

ಡ್ರ್ಯಾಗನ್ ಆಗಿ ಮುತ್ತಬಹುದು ಪಾರಿವಾಳ

ಕಾಲನೂ ಉರುಳಿಸಬಹುದು ತನ್ನ ದಾಳ

ರಣಹದ್ದಾಗಿ ಬದಲಬಹುದು ಪಾರಿವಾಳ

ಮುಖಬೆಲೆಯನ್ನು ನಂಬದಿರು ‘ಜಂಗಮ’

ಕಟುಕನಾಗಿ ಕುಟುಕಬಹುದು ಪಾರಿವಾಳ