ರೇಣುಕಾ ನಿಡಗುಂದಿ 

ನಿನ್ನ ಕಣ್ಣಿನ ಮಿಂಚನ್ನು
ಎಳೆಎಳೆಯಾಗಿ ಹಿಂಜಿ
ಹೊಳಪಿನ ಒಂದು ದುಪ್ಪಟಿಯನ್ನು ನೂತಿದ್ದರೆ ಇವತ್ತಿನ ರಾತ್ರಿ ಅದನ್ನೇ ಹೊದ್ದಿರುತ್ತಿದ್ದೆ….

ದುಂಡಗಿನ ಪುಟ್ಟ
ಕೊಳವೆಬಾವಿಯೊಳಗೆ ಇಳಿಯುವಂತೆ
ಸರಸರನೆ ಜಾರಿ
ಮಿರಮಿರನೇ ಹೊಳೆಯುವ ಪುಟ್ಟಪುಟ್ಟ ಮೀನುಗಳನ್ನೆಲ್ಲ ಬಾಚಿಕೊಳ್ಳುತ್ತಿದ್ದೆ….

ಆಗಾಗ ನನ್ನ ಕೆನ್ನೆ ಸವರುವ
ನಿನ್ನ ರೆಪ್ಪೆಗಳು ಸಮುದ್ರದ ಅಲೆಗಳಂತೆ
ಬರಸೆಳೆದುಕೊಂಡಾಗೆಲ್ಲ ನಾನೊಂದು
ನೀಲಿ ಮೀನಂತೆ ಆಕಾಶದ ತುಂಬೆಲ್ಲ
ಈಜಾಡುತ್ತಿರುತ್ತಿದ್ದೆ…

ಒಳಗೆ ಸತ್ತು ಹೊರಗೆ
ಮಿರಿಮಿರಿ ಮಿಂಚುತ್ತಿದ್ದೇನೆ
ಸತ್ತ ವಾಸನೆ ಹರಡದಿರಲೆಂದು
ಗರಗರ ಸುತ್ತುತ್ತಿದ್ದೇನೆ
ಪುಪ್ಪುಸದಲ್ಲಿ ಕೊಳೆತಗಾಳಿ
ಕಣ್ಣಿನಲ್ಲಿ ಕೀಸರು .,