ಗೀತಾ.ಎನ್.ಸ್ವಾಮಿ

ಒಂದು ನಗು ಸಾಕು ಒಡಲೊಳಗಿನ

ಉರಿಯ ತಣಿಸಿ ತಣ್ಣಗಾಗಿಸಲು

ಗಾಯದ ಮೇಲೆ ತಂಪು ಗಾಳಿಯ ಬೀಸಿ

ತೆರೆದ ಕಣ್ಣುಗಳೊಳಗೆ ನಿದ್ದೆ ಮೂಡಿಸಲು||

ಒಂದು ನಗು ಸಾಕು ನಡು ಇರುಳಿನ ನಡುವೆ

ಸುಡುವ ಕನಸುಗಳ ನಿಂದರಿಸಿ

ಬೆಳಕು ಹರಿಯುವ ಮುನ್ನ ಹರಿಗೋಲನ್ನೆತ್ತೆ

ಶಾಂತ ಸಾಗರದೊಳಗೆ ಪಯಣ ಬೆಳೆಯಿಸಲು||

ಗದ್ದಿ ರಾಶಿಗಳ ನಡುವೆ ಹೊದ್ದು ಮಲಗಿರುವ

ಚಿಣ್ಣರನ್ನು ಎಬ್ಬಿಸಿ ಕೈಲಿ ಬುಗುರಿಯ ಕೊಟ್ಟು

ಚಿಗುರುವ ಮೊದಲೆ ಚಿವುಟಿ ಎಸೆದವರ

ಎಳೆ ಎದೆಯ ಆಸೆಗೆ ಬಣ್ಣ ಮೂಡಿಸಲು||

ಸಾಕೊಂದು ನಗು ಕೆಂಪಡರಿದ ಮುಖದ

ಸುಕ್ಕು ನಿರಿಗೆಗಳೊಳಗೆ ಬಿಗುಮಾನ ಮರೆಸಿ

ಕೋಪವ ಶರಣಾಗಿಸಿ ಸಲಾಮ ಹೊಡಿಸಿ

ಹೊನ್ನ ಕಿರಣವನ್ನರಿಸಿ ಅರವಿಂದ ಅರಳಿಸಲು||

ಸಾಕೊಂದು ನಗು ಎಲ್ಲಾ ಕಹಿಗಳ ಮರೆತು

ಸಿಹಿ ಸಿಹಿಯ ಮೆಲ್ಲ ಮೆಲ್ಲನೆ ಸವಿದು

ಬೆಚ್ಚು ಬಾಯ್ಬಿಟ್ಟು ಪಕ್ಕನೆ ನಗುವ

ಪುಟ್ಟ ಮಗುವಿನಂತಾಗಲು||