ಧರ್ಮೇಶ್ 

ಮಗಳೊಂದಿಗೆ ‘ಸೆಲ್ಫಿ’ ತೆಗೆದುಕೊಳ್ಳಬೇಕಿದೆ!
ದಯವಿಟ್ಟು ಹುಡುಕಿಕೊಡಿ
ಪ್ರಧಾನಿಯವರ ‘ಆಜ್ಞೆ’ ಮೀರಲಾಗದು
ಅದೂ, ‘ಮನದಾಳದ ಮಾತು’ ಬೇರೆ

‘ಮಗಳನ್ನು ಉಳಿಸಿ’ಕೊಳ್ಳಲಾಗದ
ಗುಜರಾತಿನ ಬೀದಿಯ, ಗಲ್ಲಿಗಳಲ್ಲಿ
ಬರ್ಬರತೆಯ ಖೈರ್ಲಾಂಜಿಗಳಲ್ಲಿ,
ರಥಯಾತ್ರೆ ಸಂಚರಿಸಿದ ಹಾದಿಯುದ್ದಕ್ಕೂ….
ಕೀಚಕರ ಅಟ್ಟಹಾಸಕ್ಕೆ ಸಿಕ್ಕು
ನಲುಗಿಹೋದವರ ನಡುವೆ
ಕೆಂಪು ದೀಪದಡಿಯ ನರಳಿಕೆಯಲ್ಲಿ
ಬಿಡದೆ ಹುಡುಕಿ ಕಂಗಾಲಾಗಿದ್ದೆನೆ

ಹುಡುಕಿಕೊಡಿ, ಎಂದು ಕೇಳಿದ್ದೇನೆ
ಸಂಸ್ಕೃತಿ, ಧರ್ಮ ರಕ್ಷಕರಲ್ಲಿ
ನೈತಿಕ ಪೋಲೀಸರಿಗೂ ದೂರಿತ್ತಾಗಿದೆ
ಜಿಹಾದಿಗಳಿಗೂ ಮನವಿ ಕೊಟ್ಟಿದ್ದೇನೆ

ಆಳರಸರ ಅಂತಃಪುರ,
‘ಭೋಗ’ದ ಸರಕಿನ ಮಾರುಕಟ್ಟೆಯಲ್ಲಿ
ಕಳೆದು ಕರಗಿಹೋಗಿರುವ
ಮಗಳಿಗಾಗಿ ಹುಡುಕುತ್ತಿದ್ದೇನೆ

ದಯವಿಟ್ಟು ಹುಡುಕಿಕೊಡಿ
ಕಮರಿದ ಗರ್ಭಗಳಿಂದ,
ಮಗಳನ್ನು ‘ಉಳಿಸಿ’ಕೊಡಿ
ಒಂದು ‘ಸೆಲ್ಪಿ’ ತೆಗೆದುಕೊಳ್ಳಬೇಕಿದೆ.