ಮುತ್ತು ಬಳ್ಳಾ ಕಮತಪುರ

ಸಾವಿನ ಮೆರವಣಿಗೆಯಲಿ ಎಷ್ಟು ದೂರ ನಡೆಯಬಹುದು ಹೇಳು |
ನೋವಿನ ಬೇನೆಯನು ಎಷ್ಟು ಹೊತ್ತು ತಡೆಯಬಹುದು ಹೇಳು ||

ಎಲ್ಲೆಲ್ಲೂ ಧರ್ಮ ಹಿಲಾಲು ಬಹು ಬೇಗ ವಿಷವಾಗಿ ಹರಡುತ್ತದೆ |
ಸದ್ಯ ಎಲ್ಲದಕ್ಕೂ ಬಣ್ಣಗಳ ಮೇಲಾಟ ಏನಿರಬಹುದು ಹೇಳು ||

ಭಾರವನು ಎತ್ತಿದಷ್ಟು ಹಗುರವೆ ತದನಂತರದ ಗಾಯಗಳು |
ಈ ಗಾಯ ಬೂದಿ ಮುಚ್ಚಿದ ಕೆಂಡ ಅರಿಯಬಹುದು ಹೇಳು ||

ಇದ್ದಾಗ ಅನುಭವಿಸಿದ ರೂಪ ಅಳಿದಾಗ ಜಗತ್ತಿನ ಕಣ್ಣಿಗೆ ವಿಕಾರ |
ವಿರೂಪಗೊಳಿಸುವ ದಹನಕಾರಿ ಗುಣ ಯಾಕಿರಬಹುದು ಹೇಳು ||

ಸುಡುವ ಬೆಂಕಿಯಲಿ ಮುತ್ತು ನೊಂದ ಬೆಂದ ಜೀವಗಳೆಷ್ಟೊ ಕೇಳು |
ಅಲೆದಾಟದ ಅಲೆಮಾರಿಯ ಬದುಕೆಷ್ಟು ಹಣ್ಣಾಗಿರಬಹುದು ಹೇಳು ||