Charles Bukowski

ಕನ್ನಡಕ್ಕೆ : ಚಿದಂಬರ ನರೇಂದ್ರ

ಎಲ್ಲೋ ಓದಿದ್ದು.
ಒಮ್ಮೆ ಹೆಮಿಂಗ್ವೆ ಸೂಟ್ ಕೇಸ್ ತುಂಬ
ಹಸ್ತಪ್ರತಿಗಳನ್ನು ರೈಲಿನಲ್ಲಿ
ಕಳೆದುಕೊಂಡುಬಿಟ್ಟನಂತೆ ;
ಎಷ್ಟು ಹುಡುಕಾಡಿದರು ಅವು ಮತ್ತೆ ಸಿಗಲಿಲ್ಲ.
ನನ್ನ ಸಂಕಟ ಅಷ್ಟು ದೊಡ್ಡದಲ್ಲ
ಆದರೂ ಕೇಳಿ ;

ಮೊನ್ನೆ ರಾತ್ರಿ ಮೂರು ಪುಟಗಳ
ಕವಿತೆಯೊಂದನ್ನು ಬರೆದೆ.
ಕೀ ಬೋರ್ಡ ಜೊತೆ ಉಡಾಫೆಯಿಂದ
ಆಟ ಆಡುತ್ತಿದ್ದಾಗ ಅಚಾತುರ್ಯದಿಂದ
ಆ ಕವಿತೆಯನ್ನ ಡಿಲೀಟ್ ಮಾಡಿಬಿಟ್ಟೆ.
ನನ್ನನ್ನ ನಂಬಿ
ಮೊದಲ ಬಾರಿ ನೀರಿಗಿಳಿದ
ಹುಡುಗ ಕೂಡ ಇಂಥ ತಪ್ಪು ಮಾಡುವುದಿಲ್ಲ
ನಾನು ಮಾಡಿಬಿಟ್ಟೆ.

ಹಾಗಂತ
ನನ್ನ ಈ ಮೂರು ಪುಟಗಳ ಕವಿತೆಯೇನೂ
ಅಂಥ ಅಮರ ಕಾವ್ಯವಲ್ಲ
ಆದರೂ ಅಲ್ಲಲ್ಲಿ ಕೆಲ ರೋಚಕ ಸಾಲುಗಳಿದ್ದವು
ಅವು ಮಾತ್ರ ಈಗಿಲ್ಲ
ಆ ಹೊಸ ಸ್ಪರ್ಶ
ಹೊಸ ವಾಸನೆ ಮುಖ್ಯ ನನಗೆ
ಹೊಸ ವೈನ್ ಬಾಟಲ್ ಒಂದನ್ನ
ಓಪನ್ ಮಾಡಿ ಮೂಸಿ ನೋಡಿದಂತೆ,
ನಾಲಿಗೆಯ ಮೇಲಿಟ್ಟು ಕಣ್ಣು ಮುಚ್ಚಿದಂತೆ.

ಈ ಸುದ್ದಿಯನ್ನ ಹೀಗೆ
ರೋಚಕವಾಗಿ ಬರೆಯುವುದು
ಒಳ್ಳೆಯ ಕವಿತೆಯ ಲಕ್ಷಣ ಅಲ್ಲ
ಆದರೂ ನನಗ್ಯಾಕೋ ಇದು ನಿಮಗೆ
ಇಂಟರೆಸ್ಟಿಂಗ್ ಅನಿಸಬಹುದು ಎಂದೆನಿಸುತ್ತಿದೆ.

ಉಹೂಂ
ಅಂಥ ಸೀನ್ ಏನೂ ಇಲ್ಲ ಅಂತೀರಾ
ಹೇಗೂ ಇಲ್ಲಿವರೆಗೆ ಓದಿದ್ದೀರಾ
ನಿಮಗೂ ಬೇರೆ ಮುಖ್ಯವಾದ ಕೆಲಸಗಳಿರಬಹುದು
ಲೆಟ್ಸ್ ಹೋಪ್ ಸೋ
ಹೌದು
ಮುಖ್ಯ ಕೆಲಸಗಳಿರಲೇ ಬೇಕು

ನನ್ನ ಒಳಿತಿಗೂ
ನಿಮ್ಮ ಉದ್ಧಾರಕ್ಕೂ.