ನರೇಂದ್ರ ಶಿವನಗೆರೆ

ಮುಸ್ಸಂಜೆ ಕಡಲ ತೀರ,

ಹಾಯಿದೋಣಿಗಳಿಲ್ಲಿ, ಕಡಲಲ್ಲಿ,

ಚೆಲ್ಲಾಪಿಲ್ಲಿ!

ಮುಸ್ಸಂಜೆ ತಿಳಿ ಕತ್ತಲಲ್ಲಿ

ಆ

ದ್ವೀಪದಲ್ಲಿ ಕಾಣುವ ಮಿಣಿ, ಮಿಣಿ ಬೆಳಕುಗಳು!

ದೂರದೇಶದ ನಾವಿಕ ನಾನು!

ಎಂದೋ ಒಂದು ಕಾಲಕ್ಕೆ, ಕಾಳಕತ್ತಲಲ್ಲಿ,

ಕಡಲು ಮುನಿದು, ಹಡಗು ಮುರಿದು,

ಈ

ದ್ವೀಪ ಸೇರಿ!

ಬದುಕ ಕಟ್ಟಿದ ನೆನಪು.

ಎಪ್ಪತ್ತರ,

ಈ

ಸೊಕ್ಕಿನ, ಮುಪ್ಪಿನಲ್ಲಿ!

ನನ್ನೆಲ್ಲ ಮುದಿ ಸುಕ್ಕುಗಳಲ್ಲಿ!

ಈ

ಕಡಲ ನೀರು

ಬರೀ ಉಪ್ಪು!

ಕತ್ತಲೆ ಕವಿಯುವ ಸಮಯಕ್ಕೆ

ಮೀನುಬಲೆಯ

ಸುಪ್ಪತ್ತಿಗೆಯ ಮೇಲೆ ಮಲಗಿ

ತೆರೆದ ಆಕಾಶಗಂಗೆಯ ದಿಟ್ಟಿಸುವನಿಗೆ!

ಕಿವಿಯಲ್ಲಿ ಕೊರೆಯುವ

ಕಡಲ, ಮೊರೆತವ

ಕಣ್ಣಲ್ಲೇ,

ಅಂತರಿಕ್ಷಕ್ಕೆ ದಾಟಿಸುವಾಸೆ!

ಈ

ಅಶಾಂತ ರಾತ್ರಿಗಳಲ್ಲಿ

ಪಕ್ಕದ, ದಟ್ಟ ಕಾಡಿನ

ಒಂಟಿ ಮಂಟೆ ಹಕ್ಕಿ ಕೂಗು!

ನನ್ನ ಆದಿ, ಹಾದಿ, ಅಂತ್ಯಗಳೆಲ್ಲ,

ಸ್ವಪ್ನಲೋಕದ, ಒಂಟಿ ದೋಣಿಯನೇರಿ!

ಕಡಲಲ್ಲಿ, ಅಲೆದಲೆದು

ಈ

ದ್ವೀಪಕ್ಕೇ, ಮರಳಿ ತಂದಾಗ,

ಬೆಚ್ಚಿಬಿದ್ದೆದ್ದ

ನಾನು

ಎರಡು ದ್ವೀಪದ ಮಧ್ಯೆ ಆಳ ಕಡಲು!