ಗಿರಿಜಾಶಾಸ್ತ್ರಿ

ಮಾಯಾ ಯುದ್ಧ

ರಚ್ಚೆ ಹಿಡಿದು ಹೀಗೆ ಕಾಡಲು
ಹಕ್ಕು ನಿನಗೆ ಕೊಟ್ಟವರಾರು
ಕಸಿವ ಕಲೆಯನ್ನೂ
ಹುಸಿವ ಮನವನ್ನೂ
ಕರತಲಾಮಲಕ ಮಾಡಿಕೊಳ್ಳಲು?
ಕೊಲ್ಲಲೇಬೇಕೆಂದಿದ್ದರೆ
ವಿಷ ಚೂರಿ ಬೆಂಕಿ ಹಗ್ಗ
ಎಲ್ಲ ಇತ್ತಲ್ಲ
ಕೈ ಕಣ್ ಅಳತೆಯಲ್ಲೇ
ಒಂದು ಕೂಗು ಹಾಕಿದ್ದರೂ
ಸಾಕಿತ್ತು..
ಮಾಯಾ ಯುದ್ಧ ಹೂಡುವ ಗರಜೇನಿತ್ತು?

ನಿನ್ನ ರುಜುವಾತು

ಮೋಡಗಳ ಮೇಲೆ ಮುಗಿಲುದ್ದ ಹಾರುವಾಗ
ನಿನ್ನ ಭಾಸವಾಗುತ್ತದೆ.
ಬಗಲಲ್ಲೇ ಅಂಟಿ ಕುಳಿತಂತೆ
ನದಿ ಸಾಗರಗಳೂ ಹಾಯುತ್ತವೆ
ಎದೆಯೊಳಗೆ ಮೋಡಗಳ ಜೊತೆಗೆ
ಜಗತ್ತಿನ ತುತ್ತತುದಿಗೆ.
ನಿನ್ನ ಗಾಳಿ ಬೀಸುತ್ತದೆ.
ಅದರ ಪರಿಮಳ ಹೊತ್ತು
ಹಾರುತ್ತವೆ ಅರಳೆ ಪರ್ವತಗಳು
ನಿನ್ನ ರುಜುವಾತುಗಳು