ಎಚ್ ಡುಂಡಿರಾಜ್

ನಿನಗೆಂದೇ ಹಾಲು
ಕರೆದು ಇಟ್ಟಿದ್ದೆ
ಕರೆದು ಕೊಡುವಷ್ಟರಲ್ಲಿ
ನೀನೇ ಕುಡಿದುಬಿಟ್ಟಿದ್ದೆ
ನಿನಗೆಂದೇ ಹಾಕಿದ್ದೆ
ಹಾಲಿಗೆ ಹೆಪ್ಪು
ಆ ಮೊಸರು ನೀನು

ತಿಂದರೇನು ತಪ್ಪು?
ನಿನಗೆಂದೇ ಕಡೆದು
ತೆಗೆದ ಬೆಣ್ಣೆ ಮುದ್ದೆ
ಕೊಡುವ ಮುನ್ನ
ನೀನೇ ಕದ್ದು ಮೆದ್ದೆ
ತಪ್ಪೇನಲ್ಲ ಆದರೂ
ನನ್ನ ಕಂಡಾಕ್ಷಣ
ಕಳ್ಳನ ಹಾಗೆ ಓಡು
ಸಿಕ್ಕಿ ಬೀಳು, ಕೈಗಳ
ಕಟ್ಟಿದಂತೆ ಮಾಡುವೆ
ನೀ ಅತ್ತಂತೆ ಮಾಡು
ನೆನಪಿರಲಿ ಕಂದಾ
ನಮ್ಮಿಬ್ಬರ
ಈ ಒಳ ಒಪ್ಪಂದ!

ಫೋಟೋ ಕೃಪೆ : ಚಿತ್ರಮಿತ್ರ