ಸಂದೀಪ್ ಈಶಾನ್ಯ

ಇರುಳೊಂದಿತ್ತು
ಯಾರಿಗೂ ನೋವಿಡದ ಸವೆದ ಚಪ್ಪಲಿಯ ಹಾಗೆ
ಚಪ್ಪಲಿ ಬಿಡು ಅದೊಂದು ಅನುಭವದ ಮೂಟೆ
ಅದಕ್ಕೆ ಕಲ್ಲು, ಮುಳ್ಳುಗಳ ಪರಿಚಯವಷ್ಟೇ ಅಲ್ಲ
ಅದರೊಂದಿಗೆ ಪ್ರೀತಿ ಮುನಿಸುಗಳು ಇವೆ
ಚಪ್ಪಲಿ ಸುಮ್ಮನೆ ಅಷ್ಟು ಸವೆದಿಲ್ಲ ಮಾರಾಯ
ಅದಕ್ಕೆ ಅದರದೇ ಆದ ಇತಿಹಾಸವಿದೆ
ಅದದೇ ರಸ್ತೆಯಲ್ಲಿ
ಖಾಲಿ ತಲೆಯ ಮನುಷ್ಯ
ಸಿಕ್ಕ ಸಿಕ್ಕಂತೆಲ್ಲಾ ಅಂಡಲೆದರೆ
ಚಪ್ಪಲಿಗೆ ಬೀದಿಯೊಂದಿಗೆ ಸಂಬಂಧವಿರಲಾರದೇನು
ಇದೆ
ಸಂಬಂಧ ಏರ್ಪಡುವುದೆಂದರೆ ಖಾಲಿ ತಲೆಯ ಮನುಷ್ಯನ
ಹಾಗೆ ಊರು ಹೆಸರು ವಿಳಾಸದ ಜೊತೆಗೆ ಕೇಳಿದ ಕತೆಗೆಲ್ಲ ಕುತ್ತಿಗೆ ಕುಣಿಸುವುದಲ್ಲ
ಅವಕಾಶ ಸಿಕ್ಕರೆ ರಮಿಸುವುದಲ್ಲ, ಸಿಟ್ಟಿಗೇಳುವುದಲ್ಲ
ಆಗಷ್ಟೇ ಹಾರುವುದ ಕಲಿತ ಬಲಿತ ಹಕ್ಕಿಯೊಂದು
ತಾನೇ ಪಂಜರವನ್ನು ಹುಡುಕಿ ಅಲೆಯುತ್ತದಲ್ಲ ಹಾಗೆ
ಹೇಳು
ಈ ಹಕ್ಕಿಗೆ ಪಂಜರದೊಂದಿಗೆ ಅದೇನು ಸಂಬಂಧ
ಸ್ವಾತಂತ್ರ್ಯವಾ, ಬಂಧನವಾ, ಬಿಡುಗಡೆಯಾ