ರೇಖಾ ಗೌಡ 

ಮನವೆಂಬ ಮಾಯೆಯ
ಸರಿಸಿ ನೀ ನೋಡು
ತರ್ಕ ಕುತರ್ಕಗಳ ತಳ್ಳಿ
ದಿಗಿಲು ದ್ವಂದ್ವಗಳ ದಾಟಿ
ಭೂತಭವಿಷ್ಯಗಳ ಬಿಟ್ಟು
ಮರೆವು ನೆನಪುಗಳ ಮೀರಿ…

ಚಿತ್ತಸಾಗರದಿ ಏಳುವ
ನಿರಂತರ ನಿರ್ಲಜ್ಜ
ಯೋಚನೆ ಯಾಚನೆಗಳ
ಬಾಯ್ಕಟ್ಟಿ ನೀ ನೋಡು…

ಆ ಸಾಗರವು ನಾಗರವು
ಒಳಗಿಳಿದರೆ
ಸೆಳೆದೊಯ್ಯುವುದು ನಿನ್ನನೇ
ಹಿಂದಿರುಗುವ ಖಾತರಿಯಿಲ್ಲ
ದಡದಲ್ಲೇ ನಿಂತು ನೀ ನೋಡು
ಈ ಅಲೆಗಳಾಟ…

ಆಳವ ತಿಳಿ, ನೋಡಲುಬೇಡ
ಅಗಾಧತೆಯ ಅರಿ, ಅಚ್ಚರಿಪಡಬೇಡ
ಕಡಲ ಸೇರದಿರು
ಕಡಲಿಂದ ಬೇರೆಯಿರು
ನಾನೇ ಕಡಲೆನ್ನದಿರು
ಕಡಲಿಂದ ಬೇರ್ಪಡು…

ಹೃದಯಮಂದಿರದಿ ಕೂತು
ಸವಿಭಾವಗಳ ಕಡೆದು
ಅದರೊಡಲ ಅಮೃತವ ಸವಿದು,
ಉಳಿದವರಿಗೂ ರುಚಿಹತ್ತಿಸು…

ಆ ಕಡಲಿನಲ್ಲೇನಿದೆ
ಇರುವುದೆಲ್ಲಾ ಇಲ್ಲೇ ಇಲ್ಲೇ
ಎದೆಯ ಈ ಹಾದಿಯಲ್ಲೇ…