ಬರಹಗಾರನ ಸಾವು

ಶ್ರೀವಿಭಾವನ

ಅಕ್ಷರಗಳ ಜತೆ ಆಟವಾಡುತ್ತಲೆ ಆತ ಸತ್ತುಹೋದ
ಆತ ಟೈಪಿಸಿದ ಅಕ್ಷರಗಳೀಗ ಅನಾಥ…

ಪೈಸೆಗಳ ಲೆಕ್ಕಾಚಾರದ ಬದುಕು ಆತನದ್ದು
ದಿನವಿಡೀ ಆತ ಟೈಪಿಸುತ್ತಿದ್ದ.
ಶಬ್ದಗಳ ಸಂಖ್ಯೆ ಹೆಚ್ಚುತ್ತಿದ್ದಂತೆ ಏನೋ ಖುಷಿ.
ಶಬ್ದ-ಶಬ್ದಗಳ ಲೆಕ್ಕಾಚಾರದಲ್ಲಿ ಆತ ಬದುಕು ಸಾಗಿಸುತ್ತಿದ್ದ
ಟೈಪಿಸಿದ ಅಕ್ಷರಗಳೆಲ್ಲಾ ಚಿಲ್ಲರೆ ನಾಣ್ಯದಂತೆ ಆತನ
ಕಣ್ಣೆದುರು ಕುಣಿಯುತ್ತಿದ್ದವು…
ಎಲ್ಲವೂ ಪೈಸೆಗಳ ಲೆಕ್ಕಾಚಾರದಲ್ಲೇ ನಡೆಯುತ್ತಿದ್ದವು
ಪ್ರತಿ ಇರುಳುಗಳೂ  ಆತನ ಪಾಲಿಗೆ ಸುದೀರ್ಘ ಪಯಣದಂತೆ

ಅವೇ ಶಬ್ದಗಳ ರಾಶಿ- ಬೆಲೆ ಮಾತ್ರ ಭಿನ್ನ
ಎಲ್ಲಾ ಕ್ಷಣವೂ ಆತನಿಗೆ ಅಕ್ಷರ ನಿರ್ಲಿಪ್ತತೆ
ತುತ್ತು ಅನ್ನಕ್ಕಾಗಿ ಆತ ಅಕ್ಷರದ ಮಾರಾಟಕ್ಕಿಳಿದಿದ್ದ.
ದಿನಾ ಜೋಡಿಸಿ-ಅಳಿಸಿ, ಹೊಸ ಹೊಸ ಶಬ್ದಾಲಂಕಾರಗಳನ್ನು ಆತ ಮಾರುತ್ತಿದ್ದ
ಕಳ್ಳನಿಗೂ-ಸುಳ್ಳನಿಗೂ-ಸುಭಗನಿಗೂ ಒಂದೇ ರೀತಿ
ಸಂತೆಯಲಿ ನಿಂತು ಅಕ್ಷರಗಳ ಬುಟ್ಟಿ ಹಿಡಿಯುತ್ತಿದ್ದ.

ಆತನ ಶವದ ಎದುರು ತೂಗುಹಾಕಿದ್ದ ಕ್ಯಾಲೆಂಡರನ್ನು ಒಮ್ಮೆ ದಿಟ್ಟಿಸಿದೆ.
ಪ್ರತಿ ತಾರೀಖಿನೆದರು ಬರೀ ಲೆಕ್ಕಾಚಾರದ್ದೆ ಗೀಟುಗಳು
ಸಿಕ್ಕಿದ್ದಕ್ಕಿಂತ ಬಾಕಿ ಬರುವುದೇ ಹೆಚ್ಚಿದ್ದಂತಿತ್ತು.
ಆತನ ಸೋತ ಬದುಕಿನ ಲೆಕ್ಕಾಚಾರದಂತೆ.