ನನ್ನ ನಾಳೆಗಳಲ್ಲಿ

ಪ್ರಜ್ಞಾ ಮತ್ತಿಹಳ್ಳಿ

1
ಮಂಕಿ ಕ್ಯಾಪು ತುಂಬು ತೋಳಿನ
ಸ್ವೆಟರ್ನಲ್ಲಿ ಹುದುಗಿದ ನೆರಿಗೆ ಕೈ
ನಡುಗಿಸಿ ರುಜು ಹಾಕುವಾಗ ದೇವರೇ
ನನಗೆ ನನ್ನ ಹೆಸರು ನೆನಪುಳಿಯಲಿ
2
ಅವರವರ ಅಮ್ಮಂದಿರ ಅಂಗಿಯಲ್ಲಿ
ಬಾಯೊರೆಸಿಕೊಳ್ಳುವ ಮೊಮ್ಮಕ್ಕಳಿಗೆ
ಅಜ್ಜಿ ಬರೆದ ಪದ್ಯಗಳ ಕುಶಾಲಿಗಾದರೂ
ಓದಲಿಕ್ಕೆ ಬರುತ್ತಿರಲಿ
3
ವಾತ ಕಡಿಮೆಯಾದ ಇಳಿ ಮದ್ಯಾನ್ಹದ
ವಾಕಿಂಗಿನಲ್ಲಿ ಬೆಳ್ಳಿ ಕುರುಳ ಹಾರಿಸುವ
ಗಾಳಿಯಲಿ ತೇಲಿ ಬಂದ ಸುರಗಿಯ ಕಂಪ
ಕೆನ್ನೆಗಳ ಬೆಚ್ಚಗಾಗಿಸಲಾದರೂ ಮೂಗು
ಪತ್ತೆ ಮಾಡಲಿ
4
ಜಾರುವ ಭಯಕ್ಕೆ ತೆಗೆದಿಟ್ಟ ಉಂಗುರದ
ಹರಳ ಮಸುಕು ಬಣ್ಣ ಯಾವುದೆಂದು
ಕಣ್ಣಲ್ಲದಿದ್ದರೂ ತಡಕಾಡುವ ಬೆರಳು
ಗುರುತಿಸಲಿ
5
ಮೆಟ್ಟಿಲ ಹತ್ತತ್ತಿ ತಾರಸಿಯ ತುದಿಯ
ಆಕಾಶ ದಿಟ್ಟಿಸಿದರೆ ಅಖಂಡ ನೆನಪುಗಳ
ಫಳಫಳ ತಾರೆ ಬೆಳಕಲ್ಲಿ ಕತ್ತಲ
ಶೂನ್ಯ ಚುಚ್ಚದಂತೆ ಸಣ್ಣ ನಗೆಯ
ತುಂಡು ಚಂದಿರ ಇದ್ದಿರಲಿ
6
ಕೋವಿ ಕತ್ತಿ ಬಾಂಬುಗಳ ಸುದ್ದಿ
ಬಿತ್ತರಕೆ ತತ್ತರಿಸಿ ಹೊರಳಾಡಿ ತಡರಾತ್ರಿಯ
ಜೊಂಪು ಹರಿದಾಗ ಹಸಿರು ಹುಲ್ಲಿನ ಪುಟ್ಟ
ಅಂಗಳಕೆ ಅದೃಶ್ಯ ಇಬ್ಬನಿ ಬರೆದ
ಒದ್ದೆ ಬೆಳಗಿರಲಿ