ಸಿದ್ಧಗಂಗಾ ಶ್ರೀಗಳಿಗೆ ನಮನ

ಸವಿತಾ ನಾಗಭೂಷಣ

ಅಕ್ಕಾ ನಿನ್ನ ಕೂಸು ಭಿಕ್ಷಕ್ಕೆ ಬಂದಿತು
ಅಣ್ಣಾ ನಿನ್ನ ಕೂಸು ಭಿಕ್ಷಕ್ಕೆ ಬಂದಿತು
ಪ್ರಭು ನಿನ್ನ ಕೂಸು ಭಿಕ್ಷಕ್ಕೆ ಬಂದಿತು

ಇಗೋ… ಭಿಕ್ಷ… ತಗೋ ಭಿಕ್ಷ….
ಮಂದಿ ನೀಡಿದರು ಭಿಕ್ಷ
ತನು ಮನ ಧನದ ಭಿಕ್ಷ
ಕೆಲಸ ಬೊಗಸೆಯ ಭಿಕ್ಷ
ಪಡೆದು ಪಡೆದು ಗುಣವಂತನಾದನು
ನೀಡಿ ನೀಡಿ ಸಿರಿವಂತರಾದರು

ಭಿಕ್ಷ ಪಡೆದಾತ ಹಂಚಿದನು ಮೂಜಗಕೆ
ಉಣಿಸಿದನು ಅನ್ನವನು ತಿದ್ದಿಸಿ ಅಕ್ಕರವ
ಬೆಚ್ಚಗೆ ಹೊಚ್ಚಿ ತಟ್ಟಿ ಮಲಗಿಸಿ
ಕನಸೊಳಗೂ ಬಂದು ಬಿತ್ತಿದನು ಬೆಳಕ
ತಲೆ ಎತ್ತಿ ನಡೆವ ಬದುಕಿನ ಪುಳಕ

ಅಯ್ಯೋ ನಾಚಿ ಕಣ್ಣೀರಾಗಿದೆ ಮಾತು!
ಹೀಗೆ ಬಂದನವ್ವಾ ಹಾಗೆ ಹೋದನವ್ವಾ…
ತನ್ನ ತಾನರಿತು ಕೋಟಿ ಜೀವಗಳಲಿ ಬೆರೆತು…